Navoiy kon-metallurgiya kombinati tomonidan muhim ahamiyatga ega investitsion loyihalarning bosqichma-bosqich amalga oshirilishi amaldagi gidrometallurgiya zavodlarini modernizatsiya qilish va maʼdan qayta ishlash quvvatlarini oshirishga xizmat qilmoqda.

Xususan, 7-gidrometallurgiya zavodi texnogen chiqindilarni qayta ishlaydigan yirik sanoat majmuasidir. Yaqinda ushbu korxona ish boshlaganiga besh yil to‘ldi. O‘tgan vaqt mobaynida 7-GMZda texnogen chiqindilarni qayta ishlash va mahsulot ishlab chiqarish hajmini oshirish bo‘yicha keng ko‘lamli ishlar bajarildi. Dastlab mazkur korxonaning loyiha bo‘yicha yillik qayta ishlash quvvati 15 mln. tonna etib belgilangan bo‘lsada, zavod mutaxassislarning saʼy-harakatlari bilan joriy yilda ushbu ko‘rsatkichni 20 mln. tonnadan oshirish rejalashtirilgan.

Bugungi kunda korxonada “7-gidrometallurgiya zavodining qayta ishlash quvvatini kengaytirish” investitsion loyihasi doirasida qurilish-montaj ishlari olib borilmoqda. Ayni vaqtda zavodda yangi tegirmonlar o‘rnatilmoqda. Kelgusida mazkur loyiha to‘liq quvvatda ishga tushirilgach, zavod yillik qayta ishlash quvvatini 26 mln. tonnaga yetkazish mo‘ljallangan. Yangi tegirmonlar uchun zarur asbob-uskuna va ehtiyot qismlar mahalliylashtirilib, Navoiy mashinasozlik zavodi hamda Zarafshon taʼmirlash-mexanika zavodida tayyorlanyapti. Qurilish ishlari Zarafshon qurilish boshqarmasi tomonidan amalga oshirilmoqda.

Shu bilan birga 7-GMZning qator sexlarini kengaytirish ishlari ham olib borilmoqda. Bu kabi bunyodkorlik ishlari zavodda mahsulot ishlab chiqarish hajmini oshirishga xizmat qiladi.

“NKMK” AJ Matbuot xizmati