Navoiy kon-metallurgiya kombinatining 7-gidrometallurgiya zavodida 2026-yilda ham texnogen chiqindilarni qayta ishlash quvvatlarini kengaytirish va mahsulot ishlab chiqarish hajmini oshirishga qaratilgan investitsion loyihani amalga oshirish davom etmoqda.

So‘nggi yillarda korxonada olib borilayotgan keng ko‘lamli modernizatsiya ishlari natijasida texnogen chiqindilarni qayta ishlash hajmi ortib bormoqda. Kombinat va zavod mutaxassislarining saʼy-harakatlari bilan 2025-yilda zavodda 4 ta yangi maydalash tegirmoni ishga tushirilib, ularning soni 12 taga yetkazildi. Yangi tegirmonlarning ishga tushirilishi natijasida zavodda o‘tgan yilda 21,8 mln. tonna texnogen chiqindilar qayta ishlandi. Kelgusida mazkur loyiha to‘liq quvvatda ishga tushirilgach, zavodning yillik qayta ishlash quvvatini 26,3 mln. tonnaga yetkazish rejalashtirilgan.

Bugungi kunda investitsion loyiha doirasida 7-gidrometallurgiya zavodida konveyerlar, tegirmon agregatlari, quyultirgichlar va boshqa qurilmalarning beton asos qismlarini yig‘ish hamda muhandislik kommunikatsiya tarmoqlarni montaj qilish ishlari olib borilmoqda.

2026-yilda zavodning G‘alvirlash va maʼdanni tayyorlash, Maydalash, Quyultirish, Sianlash va sorbsiya sexlarida issiqlik, gaz, suv va oqova tarmoqlarini montaj qilish va obodonlashtirish ishlari amalga oshirilishi belgilangan. Shuningdek, Desorbsiya, elektroliz va ko‘mirni qayta faollashtirish sexi binosining asosiy karkas ishlarini bajarish, tashqi devor va tom yopish ishlarini yakunlash, texnologik uskunalarni o‘rnatish, elektromontaj ishlarini yakuniga yetkazish hamda xizmat ko‘rsatish maydonlarini tashkil etish mo‘ljallangan.

Taʼkidlash kerakki, zarur asbob-uskuna va ehtiyot qismlar mahalliylashtirilib, Navoiy mashinasozlik zavodi hamda Zarafshon taʼmirlash-mexanika zavodida tayyorlanyapti. Qurilish-montaj ishlari Zarafshon qurilish boshqarmasi tomonidan amalga oshirilmoqda.

“NKMK” AJ Matbuot xizmati