So‘nggi sakkiz yilda Navoiy kon-metallurgiya kombinatida muhim ahamiyatga ega investitsion loyihalarning bosqichma-bosqich amalga oshirilishi natijasida korxona mutaxassislari tomonidan 4 ta yangi zavod ishga tushirildi. Shunday sanoat korxonalaridan biri bu texnogen chiqindilarni qayta ishlaydigan 7-gidrometallurgiya zavodidir.

Bugungi kunda korxonada “7-gidrometallurgiya zavodining qayta ishlash quvvatini kengaytirish” investitsion loyihasi doirasida texnogen chiqindilarni qayta ishlash va mahsulot ishlab chiqarish hajmini oshirish bo‘yicha qurilish-montaj ishlari davom etmoqda.

- Dastlab korxonamizning loyiha bo‘yicha yillik qayta ishlash quvvati 15 mln. tonna etib belgilangan bo‘lsada, zavod mutaxassislarning saʼy-harakatlari bilan joriy yilda ushbu ko‘rsatkichni 20 mln. tonnadan oshirish rejalashtirilgan. 2025-yilning o‘tgan vaqti mobaynida zavodda to‘rtta yangi tegirmon ishga tushirildi. Buning hisobiga zavodda tegirmonlar soni o‘n ikkitaga yetkazildi. Kelgusida mazkur loyiha to‘liq quvvatda ishga tushirilgach, zavod yillik qayta ishlash quvvatini 26 mln. tonnaga yetkazish mo‘ljallangan, - deydi 7-GMZ direktori Sardor Polvanov.

Taʼkidlash kerakki, yangi tegirmonlar uchun zarur asbob-uskuna va ehtiyot qismlar mahalliylashtirilib, Navoiy mashinasozlik zavodi hamda Zarafshon taʼmirlash-mexanika zavodida tayyorlanyapti. Qurilish ishlari Zarafshon qurilish boshqarmasi tomonidan amalga oshirilmoqda.

Qayta ishlash quvvati va ishlab chiqarish hajmi kengayib borayotgan mazkur zavodda hozirgi kunga qadar mingga yaqin yangi ish o‘rinlari yaratilib, asosan yosh kadrlar, shu jumladan, Navoiy davlat konchilik va texnologiyalar universiteti bitiruvchilari ishga qabul qilindi.

“NKMK” AJ Matbuot xizmati