Navoiy kon-metallurgiya kombinati tomonidan so‘nggi yillarda amalga oshirilgan investitsion loyihalar asosida barpo etilgan gidrometallurgiya zavodlarining aksariyati Qizilqum kengliklarida joylashgan. Xususan, 7-gidrometallurgiya zavodi – texnogen chiqindilarni qayta ishlaydigan yirik sanoat majmuasidir.

7-GMZda texnogen chiqindilarni qayta ishlash jarayoni maʼdanni qazib olish, texnologik maydalash, saralash va tashish uchun xarajatlarning yo‘qligi bilan kombinatning boshqa gidrometallurgiya zavodlaridan ajralib turadi. Zavodda 2024-yilda 16 mln. tonna texnogen chiqindilar qayta ishlangan bo‘lsa, joriy yilda ushbu ko‘rsatkich 19 mln. tonnani tashkil etishi rejalashtirilgan.

2030-yilgacha “NKMK” AJ barqaror rivojlanish dasturiga muvofiq, bugungi kunda korxonada “7-gidrometallurgiya zavodining qayta ishlash quvvatini kengaytirish” investitsion loyihasi doirasida qurilish-montaj ishlari olib borilmoqda.

- Hozirgi vaqtda zavodda yiliga 10 mln. tonna texnogen chiqindilarni qayta ishlash quvvatiga ega 4 ta yangi tegirmon o‘rnatilmoqda. Buning natijasida zavodda tegirmonlar soni o‘ntaga yetkaziladi. Ayni vaqtda ushbu yangi tegirmonlarning ikkitasi ishga tushirildi. Tegirmonlar uchun zarur asbob-uskuna va ehtiyot qismlar mahaliylashtirilib, Navoiy mashinasozlik zavodi hamda Zarafshon taʼmirlash-mexanika zavodida tayyorlanmoqda. Qurilish ishlari Zarafshon qurilish boshqarmasi tomonidan amalga oshirilmoqda, - deydi 7-gidrometallurgiya zavodi bosh muhandisi o‘rinbosari Olim Ahatov.

Shuningdek, zavodning qator sexlarini kengaytirish ham rejalashtirilgan. Bu kabi bunyodkorlik ishlari korxonada mahsulot ishlab chiqarish hajmini oshirish uchun muhim ahamiyatga ega.

“NKMK” AJ Matbuot xizmati