Texnogen chiqindilarni qayta ishlash jarayoni ma’danni qazib olish, texnologik maydalash, saralash va tashish uchun xarajatlarning yo‘qligi bilan ajralib turadi. 7-gidrometallurgiya zavodi texnogen chiqindilarni qayta ishlaydigan ana shunday yirik sanoat majmuasidir.

Zavod laboratoriyasi – zamonaviy ilm-fan va ishlab chiqarishning uzviy uyg‘unligiga asoslangan, sanoatning eng dolzarb ehtiyojlariga javob bera oladigan bo‘linmalaridan. Mazkur laboratoriyada yuqori aniqlikdagi tahliliy ishlar muvaffaqiyatli amalga oshirib kelinyapti. Unda namuna tahlili, spektral va kimyoviy tahlillar hamda kimyoviy texnologik tadqiqotlar olib borish bo‘yicha 55 nafar muhandis-texnik xodim hamda laborantlar faoliyat olib borishmoqda.

Bir sutkada o‘rtacha 30 ta qum namunasi, 225 ta ko‘mir va ko‘mir kukuni namunasi, 4 ta katod cho‘kmasi ustida tahlil o‘tkazilib, oltin miqdori aniqlansa, spektral tahlil usuli yordamida o‘rtacha texnologik jarayondan olingan 800 dan ortiq namuna tarkibi o‘rganilib, suyuq fazada mavjud bo‘lgan oltin va boshqa turli xil qimmatbaho metallar aniqlanadi.

Laboratoriya tahlillari respublikamizda ruxsat etilgan xalqaro va davlat standartlari hamda “NKMK” AJ Markaziy ilmiy-tadqiqot laboratoriyasi tomonidan ishlab chiqilgan uslubiy qo‘llanmalar asosida amalga oshirilmoqda. Taʼkidlash kerakki, laboratoriya mutaxassislari zavod sexlarida amalga oshiriladigan tajriba jarayonlarida faol ishtirok etib, ishlab chiqarish samaradorligini oshirishga xizmat qilmoqda.

“NKMK” AJ Matbuot xizmati