Aziz hamkasblar!

Maʼnaviy hayotimizda muqaddas ayyom bo‘lgan, o‘z g‘oyasida xalqimizni ezgu va savobli amallar, mehr-muruvvat, bag‘rikenglik va saxovat daʼvat etib kelayotgan Qurbon hayiti barchangizga muborak bo‘lsin!

Keyingi yillarda mamlakatimizda milliy-diniy qadriyatlarimizni rivojlantirish yo‘lida xayrli ishlar amalga oshirilmoqda. Islom sivilizatsiyasi markazi, Xalqaro islom akademiyasi va qator xalqaro ilmiy-tadqiqot markazlari, madrasa va maktablar tashkil etildi. Bu, shak-shubhasiz, Yangi O‘zbekistonda islom maʼnaviyati va madaniyatiga katta eʼtibordan dalolatdir.

Qurbon hayiti – ulug‘ bayram. Ayni kunlarda ulug‘ ayyomning betakror ruhi va shukuhi butun musulmon ummatiga cheksiz mamnunlik ulashmoqda. Bu kunlarda yaqinlarimizni yo‘qlab ularning holidan xabar olish, yoshi ulug‘larni ziyorat qilish, muhtojlarga mehr-muruvvat ko‘rsatish, oilalarga xursandchilik ulashish maqsadga muvofiqdir. Zero, ikki dunyo saodatiga erishish yo‘lida savobli ishlarni amalga oshirish har birimiz uchun ham farz, ham qarz amaldir.

Bugun kombinatimizda ham turli millat va elat vakillari ahil va inoqlikda fidokorona mehnat qilib, yurtimiz ravnaqiga munosib hissa qo‘shib kelmoqda.

Qadrli hamkasblar!

Sizlarni Qurbon hayiti bilan yana bir bor qizg‘in muborakbod etar ekanman, barchangizga mustahkam sog‘lik-salomatlik, oilaviy tinchlik-xotirjamlik, sharafli va mashaqqatli ishlaringizda muvaffaqiyatlar tilayman.

Ilohim, ezgulik va bag‘rikenglik, xayr-saxovat, hamjihatligimiz ramzi bo‘lgan bu ayyom xonadonlaringizga qut-baraka, farovonlik olib kelsin!

Quvondiq SANAQULOV,

“Navoiy kon-metallurgiya kombinati” aksiyadorlik jamiyati

Boshqaruvi raisi – Bosh direktori.