“Navoiy kon-metallurgiya kombinati” AJning gidrometallurgiya zavodlaridagi texnologik jarayonlar bevosita suv yordamida amalga oshiriladi. Korxonalarni suv bilan taʼminlashda “Amudaryo-Zarafshon” suv quvuri muhim ahamiyatga ega.

Amudaryo daryosi suvi “Amudaryo-Zarafshon” suv quvurining 9 ta suv nasos stansiyasi yordamida 320 metr balandlikka ko‘tarilib, Zarafshon va Uchquduq shaharlari aholisi va ishlab chiqarish obyektlari, xususan 2-, 3-, 5-, 7-gidrometallurgiya zavodlariga yetkazib berilayapti. Bundan tashqari, Qizilqum sahrosida joylashgan Zarafshon, Uchquduq shaharlardagi sug‘orish maqsadlari uchun suv taʼminoti ham kombinatning ushbu suv inshootlari orqali amalga oshiriladi. Bu masʼuliyatli ishlarni Markaziy kon boshqarmasi Tashqi suv taʼminoti birlashgan energiya xizmatining mingdan ortiq ishchi-xizmatchilari bajarib kelishmoqda.

Kombinat tomonidan amalga oshirilayotgan “Amudaryo-Zarafshon” suv quvurining uchinchi suv tarmog‘ini tortish va nasos stansiyalarini rekonstruksiya qilish” investitsion loyihasi bo‘yicha qurilish ishlari joriy yilning dekabr oyida yakunlanadi hamda obyekt to‘liq quvvatda foydalanishga topshiriladi. 2017-yilda boshlangan loyiha doirasida 157,3 kilometr uzunlikdagi metall quvurlar o‘rnatilishi nazarda tutilgan bo‘lib, hozirgi kunga qadar 156,2 kilometr quvurlar yotqizildi. Qurilish-montaj ishlari Zarafshon qurilish boshqarmasi ishchi-xodimlari tomonidan amalga oshirilmoqda.

Mazkur loyiha doirasida jami 13 ta obyekt qurilishi rejalashtirilgan bo‘lib, bugungi kunda 11 ta obyekt to‘liq foydalanishga topshirilgan va joriy yilning dekabr oyi yakuni bilan barcha obyektlar to‘liq quvvatda ishlay boshlaydi. Loyiha to‘liq ishga tushgach, Amudaryodan keltirilayotgan suv hajmi yiliga 31,2 mln. kubmetrga oshadi.

“NKMK” AJ Matbuot xizmati.