“Qizilqum” kon boshqarmasi tarkibidagi Uchquduq tumanida joylashgan “Arslontov” konida tog‘ jinslarni qazib olish rejasi muddatida bajarib kelinmoqda. Bunda konning 500 nafardan ortiq ishchi-xodimi o‘zlarining munosib hissasini qo‘shib kelishmoqda.

2024-yilda 6,7 mln. kubometrdan ziyod tog‘ jinslari qazib chiqarilgan bo‘lsa, 2025-yilning o‘tgan 6 oyida bu ko‘rsatkich qariyb 3,5 mln. kubometrni tashkil etdi hamda burg‘ilash ishlari rejasi 282,6 ming pogona metrga bajarildi. Joriy yilning birinchi yarim yilligida 1-gidrometallurgiya zavodiga 833 ming tonnaga yaqin maʼdan tashildi.

- “Arslontov” konida ishlab chiqarish rejalarini o‘z vaqtida bajarilishini taʼminlash, ishlab chiqarish samaradorligini oshirishda zamonaviy avtotransport vositalari va konchilik texnikalaridan keng foydalanilmoqda. Yuk ko‘tarish quvvati 55 tonna bo‘lgan avtoag‘dargichlar yordamida bir sutkada o‘rtacha 18-20 ming kubometr tog‘ jinslari tashilmoqda. Qazib olingan oltin tarkibli maʼdan temir yo‘l orqali 1-gidrometallurgiya zavodiga qayta ishlash uchun yetkazilmoqda, - deydi kon bosh muhandisi Maqsud Bozorov.

Joriy yilda mazkur konga 3 ta burg‘ilash uskunasi, 1 ta avtoag‘dargich va 1 ta frontal avtoyuklagich kabi yangi konchilik texnikalari keltirildi. Bu, o‘z navbatida, burg‘ilash, tog‘ jinslarini qazib olish, maʼdan tashish ishlari xajmining oshishiga olib keladi.

“NKMK” AJ Matbuot xizmati