Navro‘z umumxalq bayrami arafasida Navoiy kon-metallurgiya kombinatining “Auminzo-Amontoy” koni tarkibidagi “Asovqoq” karyerida maydalash-saralash majmuasi ishga tushirildi.

“Auminzo-Amontoy” konida tog‘ jinslarni qazib olish hajmini oshirish uchun barpo etilgan mazkur majmuaning qurilish-montaj ishlari qisqa muddatda amalga oshirildi.

- Karyerda maydalash-saralash majmuasining ishga tushirilishi ishlab chiqarish ko‘rsatkichlarini oshirib borishga xizmat qiladi. Ushbu majmua yiliga o‘rtacha 540 ming tonna oltin tarkibli maʼdanni maydalash quvvatiga ega. Maydalangan maʼdan qayta ishlash uchun gidrometallurgiya zavodlariga yetkaziladi, - deydi Shimoliy kon boshqarmasi bosh mexanigi o‘rinbosari Yunus Ergashov.

Mazkur majmua uchun asbob-uskuna va ehtiyot qismlar mahalliylashtirilib, Shimoliy kon boshqarmasining Taʼmirlash-mexanika sexi va Kon jihozlarini taʼmirlash sexida tayyorlandi. Qurilish-montaj ishlari kon boshqarmasi tomonidan amalga oshirildi.

Majmuani ishga tushirishga bag‘ishlangan tadbirda kon boshqarmasi rahbariyati, kon ishchi-xodimlari ishtirok etishdi.

“NKMK” AJ Matbuot xizmati