Bugungi kunda atrof-muhitni muhofaza qilish masalasi dolzarb muammolardan biriga aylangan. Bu kabi muammolarni hal etishning yagona yechimi esa tabiatga oqilona munosabatda bo‘lish, bor imkoniyatlarni ishga solgan holda ko‘kalamzorlashtirish, yashillikni ko‘paytirish va “yashil energetika”dan unumli foydalanishga asosiy eʼtiborni qaratishdir.

Navoiy kon-metallurgiya kombinatida ekologiya va atrof-muhitni muhofaza qilish, atmosfera havosi va suv-yer resurslarini asrash, chiqindilarni boshqarish masalalariga alohida eʼtibor qaratilmoqda. Xususan, kombinatning ishlab chiqarish korxonalarida ifloslantiruvchi moddalarni ushlab qoluvchi chang-gaz tozalash uskunalari o‘rnatilgan.

Shu jumladan, 2024-yilda Navoiy mashinasozlik zavodining Quymachilik sexidagi chang-gaz tozalash uskunalari modernizatsiya qilinib, samaradorligi 99 foizga teng bo‘lgan ikkita yangi uskuna o‘rnatildi. Shuningdek, 3-gidrometallurgiya zavodining sexlarida 8 ta chang-gaz tozalash uskunasi modernizatsiya qilindi. Bu esa atmosfera havosiga tashlanadigan ifloslantiruvchi moddalarning kamayishiga olib keldi. Joriy yil yakuniga qadar korxonalarda yana 7 ta shunday uskuna o‘rnatilishi rejalashtirilgan.

- Atmosfera havosini muhofaza qilish maqsadida chang-gaz tozalash uskunalarini joriy etish, avtomatlashtirilgan monitoring stansiyalari orqali nazoratni kuchaytirish ishlari amalga oshirilmoqda. Barcha konlarda muntazam ravishda chang bostirish ishlari va chiqindi omborlarida suv bilan namlatish ishlari olib borilib, atmosferaga chang ko‘tarilishining oldini olish bo‘yicha ishlar bajarilmoqda. Bu ishlar korxonaning ekologik masʼuliyati yuqori ekanini ko‘rsatadi, - deydi “NKMK” AJ Atrof-muhitni muhofaza qilish bo‘limi boshlig‘i Xayrullo Baqoyev.

2024-2026-yillarga mo‘ljallangan tarmoq jadvaliga asosan, atmosfera havosini nazorat qilish bo‘yicha avtomatik namunalar olish va tahlil qilish stansiyalarini o‘rnatish ishlari ham bosqichma-bosqich amalga oshirilmoqda. O‘tgan yili ikkita shunday stansiya kombinat bo‘linmalarida joriy qilindi. Ular orqali chiqindilarning meʼyordan oshmasligi doimiy ravishda nazorat qilinib, zarur choralar tezkorlik bilan ko‘rib borilmoqda.

“NKMK” AJ Matbuot xizmati