Maʼlumki, konchilik va metallurgiya sanoati atrof-muhitga taʼsir ko‘rsatadi, chunki soha korxonalarida ko‘p tarmoqli va murakkab texnologik jarayonlar hamda yer osti va ochiq konchilik ishlari amalga oshiriladi.

“NKMK” AJning Markaziy ilmiy-tadqiqot laboratoriyasi tarkibida atrof-muhit muhofazasi va radioaktiv-dozimetrik nazorat laboratoriyasi faoliyat yuritmoqda. Uning asosiy vazifasi kombinat bo‘linmalari faoliyatining atrof-muhit holati va radioaktiv ifloslanishga taʼsir darajasini har tomonlama o‘rganishdan iboratdir. Buning uchun har kuni yuzlab tahlillar o‘tkazilmoqda.

Xususan, 1-gidrometallurgiya zavodining sanoat manbalaridan atmosfera havosiga chiqadigan zararli kimyoviy moddalar, oqava suvlari, “Qoraqo‘ton” konining shaxta suvlari tahlil qilinmoqda, zavod chiqindi xo‘jaligidan olingan namunalar tarkibidagi sianid va rodanid ionlarning miqdori aniqlanmoqda. Kombinat korxonalari va ularga yaqin joylashgan aholi punktlarining sanitariya-muhofaza hududlaridagi radiatsiyaviy holati hamda atrof-muhitning ekologik holati muntazam nazorat qilib borilmoqda. Navoiy mashinasozlik zavodi quymachilik sexining sanoat manbalaridan atmosferaga tashlanadigan oltingugurt angidrid miqdori o‘lchanmoqda. Shuningdek, Marjonbuloq oltin ajratib olish sexi, 3-GMZ va 5-GMZ kuydirish pechlarining chiqindi manbalaridan ajralib chiqadigan zararli kimyoviy moddalar ustidan nazorat olib borilmoqda.

Laboratoriyada ushbu muhim tahlillarni o‘tkazish uchun zamonaviy asbob-uskunalar mavjud. Bajariladigan ishlarning sifati va miqdoriga qo‘yilayotgan yangi talablar ortishi tufayli laboratoriya mutaxassislari kombinat bo‘linmalarida atrof-muhitni muhofaza qilish, mehnat muhofazasi, xavfsizlik texnikasi, yong‘in xavfsizligi va sanoat sanitariyasi holatini kompleks va maqsadli tekshirishlarda faol ishtirok etishmoqda.

Laboratoriya xodimlari tomonidan olib borilayotgan ishlar, ayniqsa, ko‘plab sanoat obyektlari joylashgan Navoiy viloyati uchun muhim ahamiyatga ega, shu bois uning faoliyati alohida eʼtiborga molikdir.

“NKMK” AJ Matbuot xizmati.