Navoiy kon-metallurgiya kombinatining Shimoliy kon boshqarmasi tarkibidagi “Auminzo-Amantoy” koni jamoasi tomonidan 2025-yildagi tog‘ jinslarni qazib olish va oltin tarkibli maʼdanni qayta ishlash uchun 3 va 5-gidrometallurgiya zavodlariga yetkazish rejalari muddatidan oldin bajarilgani eʼtirofga sazavordir.

Xususan, o‘tgan yilda 39,5 mln. kubometr tog‘ jinslari qazib chiqarilgan bo‘lsa, burg‘ulash ishlari bo‘yicha ham sezilarli o‘sish qayd etilib, 1,35 mln. pogona metr burg‘ilash ishlari amalga oshirildi. 1,3 ming nafardan ortiq ishchi-xodim mehnat qilayotgan “Auminzo-Amantoy” konida ishlab chiqarish rejalarini o‘z vaqtida bajarilishini taʼminlash, ish samaradorligini oshirishda zamonaviy konchilik texnikalarning hissasi katta. Bu ishlarni amalga oshirishda turli rusumdagi kon texnikalari, zamonaviy avtoag‘dargichlar, yo‘l-qurilish mexanizmlari, yordamchi transportlar imkoniyatidan keng foydalanilmoqda.

- 2025-yilda “Auminzo-Amantoy” maydonida metallarga termik ishlov berish va mexanik yig‘uv uchastkasi ishga tushirildi. Bu, o‘z navbatida, kon mexanizmlari va boshqa uskunalarga zarur ehtiyot qismlarni vaqtida yetkazilishiga hamda taʼmirlash ishlariga sarflanadigan vaqtni tejashga xizmat qilmoqda. Bugungi kunda Navoiy kon-metallurgiya kombinati tomonidan 5-gidrometallurgiya zavodi va “Auminzo-Amantoy” koni oralig‘ida 8 kilometrlik yangi temir yo‘l liniyasini qurish bo‘yicha loyiha amalga oshirilmoqda, - deydi kon boshlig‘i Jasur Ismatov.

2026-yilda konda ish ko‘lamini kengaytirish uchun “Uzunbuloq” va “Asovqoq” kabi karyerlarda konchilik ishlarini olib borish, davriy oqim texnologiyasi majmuasini barpo etish, tog‘ jinslarini qazib olish jarayoniga zamonaviy konchilik texnikalarini jalb etish rejalashtirilgan.

“NKMK” AJ Matbuot xizmati