Birlashgan Millatlar Tashkiloti Bosh Assambleyasi tomonidan eʼlon qilingan Xalqaro ayollarga nisbatan zo‘ravonlikka barham berish kuni munosabati bilan mamlakatimizda joriy yilning 25-noyabrdan 10-dekabr kuniga qadar “Xotin-qizlarga nisbatan raqamli zo‘ravonlikka barham berish uchun birlashaylik” shiori ostida 16 kunlik faol harakat targ‘ibot tadbirlari tashkil etilmoqda.

Ushbu munosabat bilan Navoiy shahridagi “NKMK tarixi” muzeyida “Navoiy kon-metallurgiya kombinati” AJ bo‘linmalari xotin-qizlari ishtirokida “Tenglik va hurmat” loyihasi doirasida “Biz oiladagi zo‘ravonlikka qarshimiz” mavzusida targ‘ibot-tashviqot tadbiri o‘tkazildi.

Tadbirda O‘zbekiston Respublikasi Oliy Majlisining inson huquqlari bo‘yicha vakili Sh.Jo‘rayev, Navoiy viloyati oila va xotin-qizlar boshqarmasi boshlig‘i M.Mamadiyarova, viloyat “Oqila ayollar” harakati yetakchisi A.Bobomurodova, Ayollarni reabilitatsiya qilish va moslashtirish markazi viloyat bo‘limi psixologi M.Shukurova, viloyat IIB huquqbuzarliklar profilaktikasi boshqarmasi xotin-qizlar masalalari bo‘yicha bo‘linmasi boshlig‘i G.O‘sarova va Axborot xavfsizlik boshqarmasi jinoyatchilikka qarshi kurashish bo‘limi katta inspektori B.Xojimurodov hamda “Kelajak bunyodkori” NNT psixologik markazi rahbari S.Arziqulovalar ishtirok etishdi.

Tadbir ishtirokchilari xotin-qizlarning jamiyatdagi rolini oshirish, huquq va manfaatlarini himoya qilish, tazyiq va zo‘ravonlikka qarshi kurashish, tahdid va tajovuzlarning oldini olish, gender tenglikni taʼminlash borasida amalga oshirilayotgan ishlar muhokama qilindi. Tadbir davomida zo‘ravonlikning turlari, xususan, kiberhujumlar, uni keltirib chiqaruvchi omillar, raqamli makonda uchrayotgan kiberbosim holatlari va ulardan himoyalanish usullari bo‘yicha atroflicha maʼlumot berildi. Shuningdek, shaxsiy maʼlumotlarni tarqatish, yolg‘on sahifalar ochish, onlayn bezorilik kabi holatlar hamda bunday huquqbuzarliklar uchun belgilangan qonuniy choralar yuzasidan fikr almashildi. Ochiq muloqot shaklida o‘tgan uchrashuvda xotin-qizlarga raqamli makonda o‘z xavfsizligini taʼminlash, zo‘ravonlikka duch kelganda to‘g‘ri harakat qilish bo‘yicha tavsiyalar berildi. Tadbir doirasida slaydlar orqali zo‘ravonlikning salbiy oqibatlari atroflicha tahlil etilib, mavzuga doir materiallar tarqatildi.

- Bu kabi targ‘ibot tadbirlarni o‘tkazishimizdan maqsad, oilada sog‘lom muhitni yaratish, zo‘ravonlik holatlarini oldini olish, xodimlar o‘rtasida huquqiy ong va madaniyatni oshirishdan iborat, - deydi “NKMK” AJ Gender tenglik va inklyuzivlik xizmati bosh mutaxassisi N.Amonova.

Tadbir yakunida “Kelajak bunyodkori” psixologik markazi rahbari Sohiba Arziqulova loyiha doirasida psixologik trening o‘tkazdi.

“NKMK” AJ Matbuot xizmati