O‘zbekiston Respublikasi Prezidenti Shavkat Mirziyoyevning Oliy Majlis va xalqimizga yo‘llagan Murojaatnomasida barcha yo‘nalishlardagi strategik vazifalar belgilab berildi. Ayniqsa, joriy yil “Mahallani rivojlantirish va jamiyatni yuksaltirish” yili deb e’lon qilingani yangi tashabbuslarni boshlab berdi.

Bu ishlarni hayotga izchil tadbiq etish maqsadida, yaqinda davlatimiz rahbari tomonidan tasdiqlangan “Mahallani rivojlantirish va jamiyatni yuksaltirish yili”da ustuvor yo‘nalishlar bo‘yicha islohotlar dasturlari va “O‘zbekiston – 2030” strategiyasini amalga oshirish bo‘yicha davlat dasturi to‘g‘risida”gi Farmoni islohotlarni jadallashtirish yo‘lidagi navbatdagi qadam bo‘ldi. Jumladan, 6 ta bob, 100 ta maqsad va 337 ta banddan iborat mazkur davlat dasturidan Yangi O‘zbekistonni joriy va yaqin yillarda rivojlantirish istiqbollari o‘rin olgan. Dasturda Navoiy kon-metallurgiya kombinatiga ham taalluqli uchta asosiy band va boshqa vazifalar ko‘zda tutilgan.

Farmonning 6-ilova 49-maqsad 118-bandiga ko‘ra, “Qoqpatas” va “Dovg‘iztov” oltin konlarida ma’dan qazib olish. (III navbati)” investitsiya loyihasini amalga oshirish, jumladan, investitsiya loyihasi doirasida asbob-uskunalar va tog‘-kon transport uskunalarini xarid qilish va yetkazib berish, tog‘-kon qurilish ishlarini amalga oshirish, chiqindi omborini kengaytirish, filtrlash, quritish va yoqish sexlari, bioksidlash sexi qurilishini yakunlash vazifasi topshirilgan. Bu loyihaning tadbiq etilishi ishlab chiqarish sur’atini yanada oshirish imkonini yaratadi.

Farmonning 6-ilova 53-maqsad 157-bandida esa aviatsiya infratuzilmalarini rivojlantirish loyihasi doirasida Zarafshon aerodromini rekonstruksiya qilishga kombinat ham mas’ul etib belgilangan. Bu ham, o‘z navbatida, konchilar maskani bo‘lgan Zarafshon shahar va yaqin hududlar aholisiga qulayliklarni tuhfa etadi.

Yurtboshimizning Farmoni ijrosini ta’minlash maqsadida, Navoiy kon-metallurgiya kombinatining joriy yilning 23-fevraldagi buyrug‘i asosida 33 ta banddan iborat chora-tadbirlar dasturi qabul qilindi.

Jumladan, ushbu dasturdan sohani rivojlantirishdan tashqari, ijtimoiy sohaga oid bo‘lgan “Davlat – xalq xizmatchisi” tamoyili asosida jismoniy va yuridik shaxslar qabullari va sayyor qabullar o‘tkazish, xotin-qizlarning huquq va manfaatlari hamda gender tenglikni ta’minlash, munosib ish va yashash sharoitlarini yaratish, rahbar-xodimlarning malakasini oshirish, yoshlarning bo‘sh vaqtini mazmunli tashkil etish, “O‘zbekiston bo‘ylab sayohat qil!” loyihasini amalga oshirish va boshqa muhim yo‘nalishlar o‘rin olgan.

Bir so‘z bilan aytganda, marra va vazifalar aniq. Ularni izchil amalga oshirish uchun har bir mas’ul topshiriqqa mas’uliyat bilan yondashishi talab etiladi. Navoiy kon-metallurgiya kombinatida bu borada shakllangan tajriba, qat’iy intizom mavjud.

“NKMK” AJ Matbuot xizmati