28-yanvar kuni “NKMK” AJ Matbuot markazi boshlig‘i Abdumajid Jo‘rayev ishtirokida Navoiy kon-metallurgiya kombinatida “Atrof-muhitni asrash va “yashil iqtisodiyot” yili” da Davlat dasturining bajarilishiga bag‘ishlangan navbatdagi brifing bo‘lib o‘tdi.

“O‘zbekiston – 2030” strategiyasining ikkinchi yo‘nalishi barqaror iqtisodiy o‘sish orqali aholi farovonligini taʼminlash bo‘lib, buning uchun mamlakatimiz sanoatining “drayver” sohalarini rivojlantirish va hududlarning sanoat salohiyatini to‘liq ishga solish vazifasi belgilangan.

Mazkur strategiyani “Atrof-muhitni asrash va “yashil iqtisodiyot” yili”da amalga oshirishga oid Davlat dasturi doirasida 2025-yilda “Navoiy kon-metallurgiya kombinati” AJ da 32 ta banddan iborat chora-tadbirlar to‘liq bajarildi. Kombinat tomonidan quyidagi ishlar amalga oshirildi.

Xususan, Davlat dasturining 4-ilovasi 6-bandiga muvofiq, “Mahalliylashtirish va import o‘rnini bosuvchi mahsulotlar turlarini ko‘paytirish” yo‘nalishida kombinatda 2025-yilda 1,4 trln. so‘mlik mahalliylashtirilgan mahsulot ishlab chiqarildi.

4-ilova 8-band bo‘yicha “Yirik korxonalar tomonidan ESG hisobotlarini yuritish amaliyotini yo‘lga qo‘yish hamda jamoatchilikka oshkor qilish” yo‘nalishida 2025-yilda “NKMK” AJ ga “Sustainable Fitch” xalqaro reyting agentligi tomonidan “3” darajasida va umumiy 51 ball bilan ilk bor korporativ ESG-reytingi berildi. Natijada O‘zbekiston tog‘-kon sanoatida kombinat ESG-reytingini olgan birinchi kompaniya bo‘ldi.

4-ilova 12-bandda belgilangangan “Muruntov” konini o‘zlashtirish investitsiya loyihasining navbatdagi bosqichlarini amalga oshirish” yo‘nalishida 2025-yilda 36,5 mln. dollarlik kapital mablag‘lar qurilish-montaj ishlari, konchilik texnikalari va asbob-uskunalarni modernizatsiya qilishga yo‘naltirildi.

Davlat dasturining 16-ilovasi 28-bandi bo‘yicha “Atrof-muhitni muhofaza qilish va issiqxona gazlari tashlanmalarini kamaytirishga qaratilgan strategiyani amalga oshirish” yo‘nalishida kombinatning 3 va 5-gidrometallurgiya zavodlari, Navoiy mashinasozlik zavodida 3 ta atmosfera havosidan namuna olish va tahlil qilish avtomatik stansiya, 7-gidrometallurgiya zavodida 3 ta, “Marjonbuloq” koni sanoat-tajriba uchastkasida 2 ta va Navoiy mashinasozlik zavodi quymachilik sexida 1 ta chang-gaz tozalash uskunasi o‘rnatildi.

Bugungi kunda kombinat korxonalari ekologik toza texnologiyalarga moslashgan bo‘lib, atrofga zararli kimyoviy moddalar, issiqxona gazlari chiqarmasligi uchun ularga eng so‘nggi rusumdagi filtrlar va samaradorligi yuqori bo‘lgan chang-gaz tozalash uskunalari bilan to‘liq taʼminlangan.

2025-yilda bioxilma-xillikni muhofaza qilish bo‘yicha ham keng ko‘lamli ishlar olib borildi. Jumladan, “Yashil makon” umummilliy loyihasi doirasida bahor va kuz mavsumlarida yashil hududlarni ko‘paytirish maqsadida 463 ming tup mevali va manzarali, buta ko‘chatlari o‘tqazildi.

Navoiy kon-metallurgiya kombinati atrof-muhitni muhofaza qilish va ekologiya masalasiga ustuvor ahamiyat qaratib kelmoqda. Zamonaviy ekologik texnologiyalarni joriy etish va barqaror rivojlanishni taʼminlash bo‘yicha izchil chora-tadbirlarni amalga oshirish ishlari davom etmoqda.

“NKMK” Matbuot xizmati