Yangi gidrometallurgiya zavodlari, konlar va boshqa ishlab chiqarish tarmoqlarini ishga tushirish, yangi ish o‘rinlari tashkil etish hisobiga kombinat faoliyat ko‘lami yildan-yilga kengayib bormoqda. Bu uzluksiz jarayon ilm-fan va texnologiyalarning eng so‘nggi yutuqlaridan boxabar bo‘lish, zamonaviy muhandislik texnologiyalariga doir bilimlarni egallashni talab etadi.

Zamon shiddat bilan ilgarilab, har bir sohada raqobat kuchayib, texnologiyalar tobora takomillashib boryapti. Davr maʼdanni qayta ishlashning zamonaviy, samaradorligi yuqori bo‘lgan usullarini izlab topish, yangi texnologiyalar yaratish va ishlab chiqarishga joriy etishni taqozo etyapti. Bugun nodir va qimmatbaho metallarga talab oshib borayotgan bir paytda, oson ajratib olinadigan oltin tarkibli maʼdanlar zaxirasi yildan-yilga kamaymoqda. Natijada dunyo miqyosida bu masalaga ilmiy yondashib, qayta ishlanishi qiyin bo‘lgan maʼdanlardan oltin ajratib olish texnologiyalarini takomillashtirishga eʼtibor qaratilmoqda.

Navoiy kon-metallurgiya kombinatida ham bu hayotiy zaruratga aylanyapti. Ilmiy izlanishlar, fan va texnika yutuqlari, yangiliklar yaratish va ularni ishlab chiqarishga joriy etish borasida kombinat jamoasi katta yutuqlarga erishayapti. Birgina misol tariqasida aytadigan bo‘lsak, 3-gidrometallurgiya zavodida tatbiq etilgan kombinat mutaxassislarining “Texnologik va ishlanishi murakkab bo‘lgan oltin tarkibli maʼdanlarni qayta ishlash va o‘zlashtirishning kompleks texnologiyalarini ishlab chiqish va joriy etish” bo‘yicha ilmiy-amaliy ishlanmasi dunyo kon-metallurgiya sanoatida katta yutuq bo‘ldi va xalqaro miqyosda eʼtiroflarga sazovor bo‘ldi. Natijada zavodda maʼdandan oltin ajratib olish darajasi 12,4 foizga, mahsulot ishlab chiqarish hajmi 15 foizga oshdi. Bu juda katta natija hisoblanadi. Ana shunday yangilanishlar, tadqiqotlar va amaliy ishlanmalar olimlarimizning ilmiy faoliyatlarini yanada samarador bo‘lishiga erishishni taʼminlaydi.

Kombinatda bugungi kun talabdan kelib chiqib, ishlab chiqarish jarayoniga ilmiy ishlanmalar, innovatsion g‘oya va ratsionalizatorlik takliflarini joriy etishga katta eʼtibor berilmoqda. Keyingi yillarda korxona mutaxassislari tomonidan yaratilgan 46 ta ixtiroga respublika va xorijiy davlatlarning patentlari olindi. Ular ishlab chiqarishga joriy etilib, salmoqli iqtisodiy samaradorlikka erishildi.

Korxona bo‘linmalarida ixtirochilik faoliyatini qo‘llab-quvvatlash va rag‘batlantirish tizimi, yoshlarning texnik ijodiyotini rivojlantirish dasturlari ishlab chiqilgan. Har yili anʼanaviy tarzda 8 ta yo‘nalish bo‘yicha “Eng yaxshi ratsionalizatorlik taklifi” tanlovi o‘tkazib kelinadi. Yildn yilga tanlov qatnashuvchilari soni ortib bormoqda va kombinat mutaxassislari tomonidan yaratilayotgan takliflar korxonaga katta iqtisodiy foyda keltirmoqda. Jumladan, birgina 2018-2025-yillarda 1 316 ta ratsionalizatorlik taklifidan kombinat 570 mlrd. so‘m iqtisodiy samaradorlikka erishdi, ularning mualliflari 6,2 mlrd. so‘m mablag‘ bilan rag‘batlantirildi.

Har bir sohada izlanish va tajribalar ulkan yutuqlarga yetaklaydi. Navoiy kon-metallurgiya kombinatida faoliyat yuritayotgan 10 nafar fan doktori, 23 nafar fan nomzodi ham bu jihatlarga alohida eʼtibor qaratib, ishlab chiqarish va ilm-fanni integratsiyalash bo‘yicha doimiy izlanishda.

“NKMK” AJ Matbuot xizmati