Navoiy kon-metallurgiya kombinati maʼmuriyati va kasaba uyushmasi Kengashi tashabbusi bilan ishchi-xodimlar o‘rtasida kitobxonlik madaniyatini rivojlantirish, ularning kitob mutolaasiga qiziqishi va intellektual salohiyatini yanada oshirish maqsadida kombinat bo‘linmalari va korxonalarida “Eng yaxshi kitobxon” tanlovi 2025-yilning avgust-dekabr oylari davomida uch bosqichda o‘tkazildi.

Kombinat bo‘linmalarida kasaba uyushmasi vakillari, maʼnaviyat targ‘ibotchilari va yoshlar yetakchilari tomonidan ishchi-xodimlarga o‘zbek va jahon adabiyotining sara asarlaridan namunalar taqdim etib borildi.

Ushbu tanlovning saralash bosqichlarida faol ishtirok etib, g‘oliblikni qo‘lga kiritgan 60 nafarga yaqin ishchi-xodimlar bugun Navoiy shahridagi “Farhod” madaniyat saroyi kutubxonasida bilimlarini sinovdan o‘tkazishdi va tanlovning final bosqichi g‘oliblari aniqlandi.

Yakuniy natijalarga ko‘ra, Markaziy kon boshqarmasi 2-gidrometallurgiya zavodi chilangari Sherbek Shaymatov faxrli 1-o‘ringa sazovor bo‘ldi. “Qizilqum” kon boshqarmasi xodimi Mavluda Tosheva 2-o‘rin, Shimoliy kon boshqarmasi 3-gidrometallurgiya zavodi chilangari Zavqiddin Imomov 3-o‘rinni qo‘lga kiritdi.

G‘oliblar va nominatsiyalarda faol qatnashgan ishtirokchilar Kasaba uyushmasi Kengashi tomonidan qimmatbaho sovg‘alari bilan taqdirlandi.

“NKMK” AJ Matbuot xizmati