Keyingi yillarda kombinatning 3-gidrometallurgiya zavodi ishlab chiqarish quvvati oshirilishi evaziga bugungi kunda zavodning flotatsiya sexidagi flotamashinalar soni 67 taga yetgan. U yerdagi texnologik jarayonlar doimo aniqlikni talab qiladi.

Flotatsiya jarayonida “Qoqpatas”, “Dovg‘iztov” va “Auminzo-Amantoy” konlaridan keltirilgan maʼdanlar maxsus gidrotsiklonlar yordamida flotomashinalarga tushadi.

- Flotatsiya – bu foydali qazilmalarni boyitish yo‘li, aniqrog‘i mineral zarralarni fizikaviy va kimyoviy xossalariga asoslangan boyitish usulidir, Flotatsiya minerallarni boyitish hamda o‘ziga xos sirt energiyalari farqidan kelib chiqadi. Muhimi, ushbu texnologiya minerallarning interfaza yuzasida saqlanib qolish qobiliyatining farqiga asoslanadi. Oddiy qilib aytadigan bo‘lsak, qayta ishlanayotgan xomashyoning miqdori va xilma-xilligi jihatidan boyitishning boshqa texnologik jarayonlari orasida flotatsiya jarayoni birinchi o‘rinni egallaydi, - deydi sex boshlig‘i Akmal Bahranov.

Boyitish jarayoni tunu kun bir maromda davom etadi. Sexda kalsiylangan soda va kaustik soda eritmasini flotatsiya jarayoniga qo‘shish natijasida suvning yumshoqligi oshib, umumiy oltin ajratib olish ko‘rsatkichi 88 foizgacha ko‘tarildi. 2024-yil sentyabr oyida sikllar oralig‘idagi navbatdagi flotatsiya mashinasi qurib ishga tushirilishi natijasida maʼdanni qayta ishlash hajmi 8-10 foizga oshdi.

Flotatsiya sexida so‘nggi yillarda ishlab chiqarishni takomillashtirish bo‘yicha amalga oshirilgan ishlar natijasida maʼdanni qayta ishlash sifati oshdi. Jamoa ham bu yutuqlar bilan to‘xtab qolmasdan, murakkab texnologiyalarni yanada samarali ishlashi uchun yangi texnologik yechimlar ustida ish olib bormoqda.

“NKMK” AJ Matbuot xizmati.