Navoiy kon-metallurgiya kombinatining gidrometallurgiya zavodlarida pulpa va suspenziyalarni suvsizlantirish uchun ishlatiladigan quyuqlashtiruvchi vositalar konstruksiyali xususiyatlariga ko‘ra radial va plastinkali, tebranish quyuqlashtirgichlari, gidrotsiklonlar, gidravlik ajratgichlar, quyuqlashtiruvchi filtrlar, magnit quyuqlashtiruvchilarga bo‘linadi.

Markaziy konstruktorlik byurosi tomonidan kombinat zavodlari uchun S-28, S-36 va S-12 radial quyuqlashtirgichlar ishlab chiqildi va S-50, S-100 radial quyuqlashtirgichlar, mavjud bo‘lgan P-50 periferik quyuqlashtirgichlar S-50 radial quyuqlashtirgichlarga rekonstruksiya qilindi. Amalga oshirilgan o‘zgarishlardan so‘ng quyuqlashtiruvchi vositalarning ishlash chikarish hajmi 1,5 barobarga oshdi. Bu ishlarda byuroning A.Sultonov, Sh.Mirzayev, B.Ahmedov, B.Irzayev, A.Atoyev kabi konstruktorlari ishtirok etishdi. Hozirgi kunda barcha gidrometallurgiya zavodlarida yangilangan radial quyuqlashtirgichlar o‘rnatilgan.

NKMK bosh konstruktori Abdirashid Sultonov taʼkidlaganidek:

“Radial quyuqlashtiruvchi taʼminlovchi qudug‘ining optimal varianti uchun ko‘plab tajribalar va kompyuter simulyatsiyalari o‘tkazildi. Ish natijalari bo‘yicha O‘zbekiston Respublikasi Adliya vazirligi huzuridagi Intellektual mulk agentligi tomonidan foydali modellar uchun patentlar ham olindi. Quyuqlashtiruvchi vositaning eng keng tarqalgan turi – bu konusli yoki tekis tag qismi bo‘lgan metall (yoki temir-beton) silindrsimon idish. Quyuqlashgan cho‘kmani, quyuqlashtiruvchi taglikning markazida yoki uning atrofida joylashgan tushirish teshigiga o‘tkazish uchun idishning o‘rtasiga kurakli mexanizmi o‘rnatilgan bo‘lib, u radial quyuqlashtiruvchi deb ataladi. Mavjud asbob-uskunalarni modernizatsiya qilish va optimallashtirish orqali texnologik jarayonlarda suv aylanish tizimida sodir bo‘ladigan to‘siqlarni bartaraf etish imkoniyati oshmoqda.”

Yangi texnologiyalarni joriy etish bo‘yicha innovatsion markaz maʼlumotlariga ko‘ra, so‘nggi o‘n yilda kombinatning ilmiy salohiyatiga ega mutaxassislari ixtirolari uchun 37 ta patent olingan. Shundan 34 tasi O‘zbekiston Respublikasi Intellektual mulk agentligi tomonidan tasdiqlangan.

“NKMK” AJ Matbuot xizmati.