Navoiy kon-metallurgiya kombinatida konlardan qazib olingan maʼdan tarkibidagi qimmatbaho va nodir metallarni aniqlashga mo‘ljallangan geologik namunalar tahlili Gamma-aktivlashtirilgan tahlil markaziy laboratoriyasida amalga oshirilmoqda. Yangi konlarning o‘zlashtirilishi tufayli kombinat bo‘linmalari uchun bu kabi tahlillarga bo‘lgan ehtiyoj yildan-yilga oshib bormoqda.

Ikki yil oldin mazkur laboratoriya quvvatlarini kengaytirish va asbob-uskunalarni modernizatsiyalashga qaratilgan loyihani amalga oshirish ishlari boshlangan edi. Joriy yilda mazkur laboratoriyada yangi binoni qurish ishlari yakunlanib, hozirgi vaqtda zamonaviy asbob-uskunalar o‘rnatilmoqda.

Gamma-aktivlashtirilgan tahlil geologik namunadagi oltin mavjudligini aniqlaydi. Shuningdek, laboratoriyada olib borilayotgan tahlillarda tarkibida oltin kam bo‘lgan maʼdan namunalarida oltin bilan birga keladigan kumush va boshqa nodir metallarni ham aniqlash imkoni mavjud. Namunalarni tahlil qilishda aniqlik darajasi yuqori bo‘lishi shart. Hozirgi vaqtda bitta namunaga 17 soniya vaqt sarflanib, bir sutkada 3,5 mingdan ortiq namuna tahlil qilinmoqda.

Mazkur laboratoriya nafaqat kombinat bo‘linmalari, balki O‘zbekiston Respublikasi Tog‘-kon sanoati va geologiya vazirligiga qarashli geologik-qidiruv ekspeditsiyalari uchun ham namunalarni tahlil qilib berayapti. Laboratoriyada olib borilayotgan modernizatsiya ishlari tahlillar sifatini oshirish, tadqiqotlarning yangi uslublari joriy etishga xizmat qiladi.

Namunalarda qimmatbaho metallar mavjudligini aniqlash jarayoni murakkab ekanligiga qaramay, Gamma-aktivlashtirilgan tahlil markaziy laboratoriyasi bu kabi ishlarni muvaffaqiyatli bajarmoqda.

“NKMK” AJ Matbuot xizmati