Maʼlumki, O‘zbekiston – ko‘plab foydali qazilmalarga boy mamlakat. Ular orasida qimmatbaho metallar alohida o‘rin egallaydi. Hozirgi kunda respublikamizda mavjud oltin maʼdanli konlarning asosiy qismi Qizilqum kengliklarida joylashgan. Ushbu konlar Navoiy kon-metallurgiya kombinatining resurs bazasini tashkil etadi. Xomashyo zaxiralarini qidirish va aniqlash bo‘yicha ishlarni amalga oshirish kombinat geologiya sohasi zimmasiga yuklangan.

Qariyb 600 nafar ishchi-xodim ishlab kelayotgan Geologiya-qidiruv ekspeditsiyasi faoliyatining yo‘nalishlari foydali qazilma konlarining kon-geologik sharoitlari va ularning texnologik xususiyatlarini baholash, mavjud resurs bazasini kengaytirish va qo‘shimcha o‘rganish, yangi ochilgan zaxiralar asosida alohida ishlab chiqarish hududlari va konlar uchun geologik va mineral xomashyolarni texnologik xususiyatlarini hisobga olgan holda konlarni iqtisodiy qayta baholashdan iborat.

Bugungi kunda ekspeditsiya tomonidan 23 ta turli rusumdagi zamonaviy, yuqori ish unumdorligiga ega burg‘ilash uskunalari yordamida geologiya-qidiruv ishlari olib borilmoqda. So‘nggi yillarda olib borilagan geologiya-qidiruv ishlari natijasida “Qoraqo‘ton”, “Yangi Dovon”, “Ko‘lchiktov”, “Rohat”, “G‘arbiy Rohat”, “Beshashi”, “Chormitan”, “Qoqpatas” va boshqa konlarda oltin tarkibli maʼdan zaxiralarini oshirishga erishildi.

- Geologiya-qidiruv ishlarining ko‘lami yildan-yilga ortib borayapti. Misol uchun, ekspeditsiya tomonidan 2024-yilda jami 64,4 ming pogona metr burg‘ilash ishlari olib borilgan bo‘lsa, joriy yilda bu ko‘rsatkich 84,4 pogona metrga yetkazilishi rejalashtirilgan. Shu bilan birga, 15 ta loyiha bo‘yicha ham qo‘shimcha geologiya-qidiruv ishlari olib borilmoqda. Ekspeditsiyasi tarkibidagi Markaziy, 2, 3 va 4-geologiya-qidiruv partiyalari yangidan qurilgan va zamonaviy jihozlangan binolariga ega. Hozirga vaqtda bir kunda 400 ta geologik namunani tahlil qilish laboratoriyasini qurish ishlari yakunlanish arafasida, - deydi “NKMK” AJ Geologiya-qidiruv ekspeditsiyasi boshlig‘i To‘lqin Bobonov.

Ekspeditsiya tomonidan olib borilyotgan geologiya-qidiruv ishlarini raqamlashtirishga ham alohida eʼtibor qaratilmoqda. Xususan, birlamchi geologik hujjatlarni to‘plash va tahlil qilish, mahalliy geologik maʼlumotlar bazasini yaratish va raqamlashtirish, “JORC Code” hisobot standartlariga muvofiq zahiralarni qayta hisoblashda “Micromine”, “Geobank”, “Leapfrog” kabi dasturiy taʼminotlaridan foydalanilmoqda.

Shuningdek, 2025-yilda geologiya-qidiruv ishlari dasturini amalga oshirish maqsadida ekspeditsiya yangi burg‘ilash qurilmalari, laboratoriya uskunalari, ochiq va yer osti konchilik ishlarini loyihalashtirish, uch o‘lchovli modellashtirish, zaxiralarni baholash imkonini beruvchi zamonaviy dasturiy mahsulotlari bilan taʼminlanishi nazarda tutilgan.

Bir so‘z bilan aytganda, ayni paytda kombinat geologiya sohasida olib borilayotgan ishlar ko‘lami yildan-yilga kengayib, yangi konlarni izlab topishga xizmat qilmoqda.

“NKMK” AJ Matbuot xizmati