“G‘ujumsoy” koni Navoiy kon-metallurgiya kombinatining Janubiy kon boshqarmasi tarkibidagi yirik yer osti konlaridan biridir. Kondan qazib olingan oltin tarkibli maʼdan 4-gidrometallurgiya zavodiga qayta ishlash uchun yetkazilmoqda.

15 yildan ortiq vaqt mobaynida tog‘ jinslarini shaxta usulida qazish ishlari natijasida kon uzunligi 3,1 ming metrdan ortiqqa, chuqurligi esa qariyb 500 metrga yetdi. Konda maʼdan qazib olish hajmi yildan-yilga oshirilmoqda. Misol uchun, 2021-yilda 780 ming tonnadan ortiq maʼdan qazib olingan bo‘lsa, joriy yilda bu ko‘rsatkichni 850 ming tonnadan oshirish rejalashtirilgan.

- “G‘ujumsoy” konida ikkita tik va bitta qiya shaxta stvoli mavjud. Ushbu stvollar tog‘ jinslarini yer yuzasiga chiqarish, ishchi-xodimlar hamda asbob-uskuna va materiallarni shaxtaga olib tushish va olib chiqarishga xizmat qilmoqda. Toza havo hamda ishlatilgan havo oqimlari ham mazkur stvollar orqali shaxtaga yuboriladi va yer yuzasiga chiqariladi. Qiya stvoli o‘ziyurar yer osti konchilik texnikalarining bir tomonlama harakatlanishiga moslashgan. Maʼlum bir masofada qarama-qarshi tomondan kelayotgan transport vositasiga yo‘l berish uchun almashish punktlari ham mavjud, - deydi kon boshlig‘i Marat Nuraliyev.

Bugungi kunda ushbu konda qariyb 1,2 ming nafarga yaqin ishchi-xodim mehnat qilmoqda. O‘tgan davrda kon jamoasi vakillarining fidokorona mehnati yuksak davlat mukofotlari bilan eʼtirof etildi. Xususan, kon ishchilari Komil Tangirov “O‘zbekiston Respublikasida xizmat ko‘rsatgan sanoat xodimi” unvoni, Muhiddin Chorqulov “Fidokorona xizmatlari uchun” ordeni va Xolboy Eshquvvatov “Mehnat shuhrati” ordeni bilan taqdirlangan.

Bugun “G‘ujumsoy” koni jamoasi ishlab chiqarish rejalarini o‘z vaqtida bajarish bilan birga, maʼdan qazib olish hajmini oshirib borish kabi masʼuliyatli vazifalarni amalga oshirib kelmoqda.

“NKMK” AJ Matbuot xizmati