Xorijiy mamlakatlar bilan savdo-iqtisodiy va investitsiyaviy aloqalarni rivojlantirish ishlari doirasida Shvetsiyaning bir guruh yetakchi kompaniyalari vakillari Navoiy kon-metallurgiya kombinatida bo‘lishdi.

Shvetsiyaning O‘zbekistondagi Favqulodda va Muxtor elchisi Tomas Danestad boshchiligidagi yirik kompaniya va korxonalar rahbar-mutaxassislaridan iborat delegatsiya “NKMK” AJ bosh muhandisi A.Ravshanov tomonidan qabul qilindi.

Samimiy ruhda o‘tgan uchrashuvda kombinatning ishlab chiqarish quvvatlari, tog‘ jinslari qazib olish va qayta ishlash ko‘rsatkichlari, texnika va texnologiyalari, kadrlar tayyorlash, shuningdek, keyingi yillarda amalga oshirilgan investitsion loyihalar, qo‘lga kiritilgan yutuqlar, kelgusidagi rejalar va kombinat to‘g‘risida batafsil axborot berildi hamda hamkorlikning yangi istiqbollari muhokama etildi.

- Bugun yurtingizda olib borilayotgan islohotlar, investorlarga yaratilgan imkoniyatlar jahondagi yetakchi kompaniyalarning mamlakatingizga bo‘lgan qiziqishini oshirmoqda. Buning natijasida O‘zbekiston va Shvetsiya o‘rtasida turli sohalardagi hamkorlik yangi bosqichga chiqmoqda. Navoiy kon-metallurgiya kombinati faoliyati bilan tanishish davomida o‘sish surʼati yuqori bo‘lgan zamonaviy kompaniya ekaniga guvoh bo‘ldik. Bugungi uchrashuvda ko‘plab yo‘nalishlarda hamkorlikni yo‘lga qo‘yish mumkinligi haqida o‘zaro kengashib oldik. Bu borada o‘z takliflarimizni bildirdik. Bu har ikki tomon uchun ham manfaatli bo‘lishiga umid bildiramiz. Maʼlumot o‘rnida aytishim mumkinki, Shvetsiya maʼdan qazib olish bo‘yicha ming yillik tarix va tajribaga ega, - deydi Shvetsiya TIV Bosh savdo departamenti direktori Kamilla Mellander.

Shuningdek, mehmonlar Navoiy mashinasozlik zavodi va “Muruntov” koni faoliyati bilan yaqindan tanishib, ushbu ishlab chiqarish korxonalari faoliyati, yaratilgan sharoitlar va ishlab chiqarish salohiyati ularda katta taassurot qoldirdi.

“NKMK” AJ Matbuot xizmati.