“Navoiy kon-metallurgiya kombinati” AJda rahbar-xodimlar ishtirokida “Ijro intizomini mustahkamlash va “ijro.gov.uz” (edo.ijro.uz) tizimida nazoratga olinadigan hujjatlar va topshiriqlar ijrosini taʼminlash” mavzusida o‘quv-amaliy seminari bo‘lib o‘tdi.

Maʼmuriy masalalar bo‘yicha direktor N.Jo‘libekov raisligida o‘tgan ushbu seminarda korxonada ijro intizomi tahliliy-tanqidiy muhokama etildi.

Yaxshi bilamizki, har qanday tashkilot yoki idorada ijro intizomi birinchi darajali vazifa, ish samaradorligini taʼminlovchi asosiy faoliyat ko‘rsatkichi hisoblanadi. Bu borada davlatimiz rahbari: “Tanqidiy tahlil, qatʼiy tartib-intizom va shaxsiy javobgarlik - har bir rahbar faoliyatining kundalik qoidasi bo‘lishi kerak”, degan tashabbusni olg‘a surgani bejiz emas.

Ushbu muhim talabdan kelib chiqib, Navoiy kon-metallurgiya kombinatida hujjatlar va topshiriqlar ijrosini o‘z vaqtida va sifatli taʼminlash hamda nazorat qilish bo‘yicha zamonaviy tizim joriy etilgan.

Ijro intizomi barcha darajadagi rahbarlar va masʼul xodimlar uchun oltin qoida, asosiy mezon va ustuvor vazifa bo‘lishi kerakligi qatʼiy belgilanib, ular masʼuliyat va javobgarligi yanada oshirildi.

Bu masala har oy keng muhokama etilib, ishni tashkil etish jihatlari o‘quv seminarlarida ko‘rgazmali chiqishlar orqali amalga oshirilib kelinmoqda. Bunday saʼy-harakatlar o‘z navbatida xodimlar bilimi, malakasi va masʼuliyatini oshirishga xizmat qilmoqda. Chunki, har qanday korxonada ish samaradorligi, yutuqlar omili temir intizom, rahbar-xodimlar masʼuliyatiga bog‘liq. Bu borada qabul qilingan meʼyoriy hujjatlar ishni samarali tashkil etishga huquqiy zamin yaratmoqda.

Kombinatning Hujjatlar ijrosini nazorat qilish va muvofiqlashtirish bo‘limi malakali mutaxassislari tomonidan korxonada ijro intizomini mustahkamlash bo‘yicha samarali ishlar olib borilmoqda.

Yaʼni, 2024-yilda Ijro.gov.uz tizimidagi mf.ijro.uz tizimidan takomillashgan edo.ijro.uz tizimiga to‘liq o‘tildi. Ushbu tizim orqali yuqori turuvchi organlardan kelib tushgan har bir hujjat tezkor qabul qilinib, rahbariyat topshirig‘i asosida ijroga qaratilib, ijrosi to‘liq taʼminlanguniga qadar nazorat qilinmoqda.

Bo‘lim tomonidan 2024-yilda jami 8 825 ta, 2025-yilning bugungi kun holatiga 1 212 topshiriqlar nazoratga olingan bo‘lib, aksariyat topshiriqlar ijrosi taʼminlangan va 400 dan ziyod topshiriqlarning ijro muddati mavjud bo‘lib, hozirda ish jarayonida.

Bundan tashqari edo.ijro.uz tizimida o‘tgan yilda 104 ta, joriy yilning bugungi kun holatiga 39 ta Qonunchilik hujjatlari ijrosi to‘liq taʼminlanib, Adliya vazirligi, Vazirlar Mahkamasi va Hisob palatasi tomonidan nazoratdan chiqarildi.

O‘quv seminarida Umumiy bo‘lim boshlig‘i Lola Boboqulova, Hujjatlar ijrosini nazorat qilish va muvofiqlashtirish bo‘limi boshlig‘i Turg‘un G‘aniyev, Byudjetlashtirish va kontrolling boshqarmasi bosh iqtisodchisi Nurbek Farmonovlar ijro intizomi tahlili yuzasidan taqdimot qilishdi.

Ishtirokchilar tomonidan berilgan barcha savollarga mutaxassislar tomonidan batafsil maʼlumot berilib, kelgusida ijro intizomini yana-da mustahkamlash yuzasidan aniq chora-tadbirlar belgilab olindi.

“NKMK” AJ Matbuot xizmati