“Navoiy kon-metallurgiya kombinati” AJda xizmat ko‘rsatish darajasi to‘g‘risidagi kelishuvlar (SLA) asosida IT-xizmatlarni boshqarish masalalariga bag‘ishlangan seminar o‘tkazildi.

Seminardan ko‘zlangan maqsad xodimlarning SLA tamoyillari va ishlash mexanizmlari to‘g‘risida xabardorligini oshirish, shuningdek, taqdim etilayotgan IT-xizmatlar sifatini yaxshilashga qaratilgan xizmat ko‘rsatish standartlarini ishlab chiqish va joriy etishdan iborat bo‘ldi.

Seminarda Axborot-kommunikatsiya texnologiyalari boshqarmasi mutaxassislari tomonidan SLA asosiy tushunchalari va tamoyillari, kelishuv turlari va ularning o‘ziga xos xususiyatlari, xizmatlar sifatini nazorat qilish va baholash usullari, SLA doirasida bo‘linmalar o‘rtasidagi hamkorlik hamda xizmatlarni boshqarishni avtomatlashtirish vositalari taqdim etildi.

Shuningdek, “Xizmat ko‘rsatish darajasi to‘g‘risida”gi Nizom bilan tartibga solinadigan “NKMK” AJda amaldagi xizmat ko‘rsatish darajasi to‘g‘risidagi kelishuvlar ko‘rib chiqildi. Tadbir ishtirokchilari kelishuvlarni takomillashtirish yo‘llarini muhokama qilib, IT-bo‘linmalar faoliyatining shaffofligi va samaradorligini oshirish bo‘yicha tashabbuslarni ilgari surdilar.

AKTB boshlig‘i Baxodir Davlatov taʼkidlaganidek:

“Kombinat raqamli transformatsiyasi sharoitida aniq SLA standartlarini joriy etish muhim ahamiyatga ega. Ular asosida IT-jarayonlarni optimallashtirish va standartlashtirish xizmatlarning unumdorligi va sifatini oshirish, xavflarni minimallashtirish va korxonaning texnologik infratuzilmasining ishonchliligini taʼminlash imkonini beradi.”

Seminar yakunida ishtirokchilar “NKMK” AJning IT-strategiyasi doirasida SLA joriy etish bo‘yicha uslubiy tavsiyalar va kelgusi ishlar rejasini olishdi. Bunday tadbirlar nafaqat xodimlarning malakasini oshirishga, balki IT-xizmatlarni boshqarishda xizmat ko‘rsatish madaniyatini shakllantirishga ham yordam beradi.

“NKMK” AJ Matubot xizmati.