DAVLAT DASTURI – AMALDA!

“O‘zbekiston – 2030” strategiyasini “Atrof-muhitni asrash va “yashil iqtisodiyot” yili”da amalga oshirishga oid Davlat dasturini bajarish maqsadida “Navoiy kon-metallurgiya kombinati” AJda ham aniq chora-tadbirlar belgilab olingan. Mazkur chora-tadbirlar dasturida ijtimoiy sohaga ham alohida eʼtibor qaratilgan bo‘lib, joriy yilning birinchi yarim yilligida ushbu yo‘nalishda keng ko‘lamli ishlar olib borildi.

Xususan, NKMK maʼmuriyati va kasaba uyushmasi Kengashi tomonidan kombinat ishchi-xodimlari, ularning oila aʼzolari, pensionerlariga muntazam g‘amxo‘rlik ko‘rsatilmoqda. O‘tgan vaqt mobaynida kombinat pensionerlaridan 5 092 nafariga qishloq xo‘jaligi mahsulotlari xaridi uchun 5,6 mlrd. so‘m, 381 nafariga sog‘liklarini tiklashlari uchun sihatgohlarga 3,2 mlrd. so‘mlik imtiyozli yo‘llanmalar, 400 nafardan ortiq ijtimoiy himoyaga muhtoj ishchi-xodimlar va yolg‘iz pensionerlarga 449,5 mln. so‘mlik moddiy yordam hamda 215,7 mln. so‘mlik oziq-ovqat to‘plamlari berildi.

Shu bilan birga, kombinat homiyligi asosida respublikamizning chekka va cho‘l hududlarida yashovchi ming nafardan ortiq kam taʼminlangan oilalar farzandlari va oilaviy bolalar uylari tarbiyalanuvchilariga umumiy qiymati 3 mlrd. so‘mdan ziyod bo‘lgan bolalar sog‘lomlashtirish oromgohlariga imtiyozli yo‘llanmalar ajratildi.

Ichki turizmni rivojlantirish maqsadida “O‘zbekiston bo‘ylab sayohat qil!” loyihasi va “Moziyga sayohat” dasturi asosida joriy yilning o‘tgan davrida 3 ming nafardan ortiq ishchi-xodimlar, pensionerlar va mehnat faxriylari uchun Xiva, Toshkent, Buxoro, Shahrisabz, Samarqand kabi tarixiy shaharlarga sayohat va ziyoratlar tashkil etildi. Qolaversa, yurtimizda nafaqat tarixiy shaharlaru tabarruk qadamjolar, balki o‘z tabiati, tarovati bilan ajralib turuvchi iqlimi so‘lim yana ko‘plab maskanlar borki, mazkur tashabbus tufayli kombinat ishchi-xodimlari u yerlarda ham bo‘lib, hordiq chiqarib, salomatliklarini tiklashmoqda.

Bir so‘z bilan aytganda, Navoiy kon-metallurgiya kombinati tomonidan “Atrof-muhitni asrash va “yashil iqtisodiyot” yili”da belgilangan vazifalar ijrosini o‘z vaqtida taʼminlash bo‘yicha ishlar davom ettirilmoqda.

“NKMK” AJ Matbuot xizmati