2025-yilda “NKMK” AJ Markaziy ilmiy-tadqiqot laboratoriyasi tomonidan kon-metallurgiya ishlab chiqarishi uchun yuqori aniqlikdagi tadqiqotlar sohasida tizimli ishlar amalga oshirildi.

Xususan, mazkur ilmiy muassasa tarkibidagi uchta laboratoriya (tahliliy, suv taʼminoti muammolarini yechish, radiatsiya-dozimetrik nazorat va atrof-muhitni muhofaza qilish) texnik jihatdan tartibga solish sohasidagi vakolatlarning inspeksiya nazoratidan muvaffaqiyatli o‘tdi. Texnologik laboratoriya tomonidan istiqbolli konlar maʼdanlarining bir qator tahlillari o‘tkazildi. Shuningdek, tahliliy laboratoriyada 35 dan ortiq yangi o‘lchov usullari ishlab chiqildi va zamonaviy asbob-uskunalar joriy etildi. Bu, o‘z navbatida, tahlillarning yuqori aniqligi va tezkorligini taʼminladi.

Bugungi kunda laboratoriya tahlillari jarayoni shunday tashkil etilganki, qo‘l mehnatidan foydalanish kamaytirilgan. Har bir bosqich milliy va xalqaro standartlar talablariga mos keladigan zamonaviy uskunalar va qurilmalar bilan jihozlangan.

Ilmiy-tadqiqot natijalarini kon-metallurgiya ishlab chiqarishida qo‘llash Navoiy kon-metallurgiya kombinatida oltin qazib olishning ilg‘or texnologiyalarini o‘zlashtirish bilan birga, ilm-fan va ishlab chiqarish integratsiyasining amaliy namunasi bo‘lib, mahsulot sifatini oshirishga xizmat qilmoqda.

“NKMK” AJ Matbuot xizmati