Bugun Toshkent shahrida “InnoWeek–2025” VIII Innovatsion g‘oyalar xalqaro haftaligi boshlandi. Mazkur haftalik doirasida ilm-fan, texnologiya va innovatsiyalar sohasidagi bilim va ko‘nikmalarni oshirish, xalqaro tajriba almashish imkoniyatini beruvchi 30 dan ortiq ilmiy-amaliy tadbirlarni tashkil etish rejalashtirilgan.

Xususan, shunday tadbirlardan biri – “Ilm-fan va ishlab chiqarish integratsiyasi: ilmiy-tadqiqot ishlari natijalarini sanoatga joriy etishni qo‘llab-quvvatlash” mavzusidagi forum o‘tkazildi. Tadbirda mamlakatimizning ilmiy va oliy ta’lim tashkilotlari olimlari, yirik ishlab chiqarish korxonalari mutaxassislari, yosh tadqiqotchilar hamda sanoat vakillari ishtirok etishdi. Mazkur forumda “Navoiy kon-metallurgiya kombinati” AJ vakili – Ilg‘or texnologiyalar markazi direktori Ulug‘bek Sharafutdinov spiker sifatida qatnashdi.

Tadbirda taʼkidlanganidek, Navoiy kon-metallurgiya kombinati hamda Navoiy davlat konchilik va texnologiyalar universiteti o‘rtasidagi hamkorlik doirasida oliy ta’lim muassasasida olingan nazariy bilimlarni korxonadagi amaliyot davomida mustahkamlash, universitetda olib borilayotgan tadqiqotlar doirasidagi tajriba-sinov ishlarini bevosita kombinatda amalga oshirish, natijalarni olimlar va korxona mutaxassislari ishtirokida tahlil etish yo‘lga qo‘yilgan.

“NKMK” AJ Matbuot xizmati