“Navoiy kon-metallurgiya kombinati” AJda amalga oshirilayotgan transformatsiya doirasida korxonada inson resurslarini (HR – Human Resources) rivojlantirishga alohida eʼtibor qaratilmoqda. Bu boradagi ishlarni bajarish kombinat boshqarmasi tuzilmasida tashkil etilgan Inson resurslarini rivojlantirish bo‘limiga yuklatilgan.

Mazkur bo‘lim tomonidan kombinatda kadrlar malakasini oshirish, tizimdagi o‘zgarishlarni kuzatib borish, mehnat bozoridagi tendensiyalarni tahlil qilish, sifat va samaradorlikka erishishga qaratilgan kadrlar siyosatini amalga oshirish bo‘yicha keng ko‘lamli ishlar olib borilmoqda.

- Zamonaviy kompaniyalarda inson kapitali birinchi o‘rinda turadi. HR yo‘nalishida korxona faoliyatiga xalqaro standartlarni joriy etish bo‘yicha ishlar davom etmoqda. Bo‘limimiz bu borada kadrlar boshqaruvi samaradorligini oshirish, kadrlar salohiyatini mustahkamlashda faol ishtirok etmoqda. Bo‘lim mutaxassislari HR bo‘yicha yetarli tajriba va malakaga ega bo‘lib, ular tomonidan kombinat bo‘linmalarida zamonaviy usullarga asoslangan amaliy o‘quv mashg‘ulotlari va o‘qishlar tashkil etilmoqda, - deydi “NKMK” AJ Inson resurslarini rivojlantirish bo‘limi boshlig‘i Larisa Usmanova.

Taʼkidlash kerakki, bo‘lim mutaxassislari tomondan xodimlar ko‘nikmalari va salohiyatini baholash bo‘yicha maxsus model joriy etildi. Shu bilan birga, HR jarayonlarinini raqamlashtirish, ilg‘or xalqaro amaliyotlarni tatbiq etish, istiqbolli kadrlar zaxirasini yaratish yo‘lida ham qator ishlar olib borilmoqda.

Ayniqsa, ishchi-xodimlar o‘rtasida so‘rovlar o‘tkazilayotgani rahbar va xodimlar o‘rtasidagi doimiy muloqotni, shaffoflik tizimini rivojlantirish hamda boshqaruv darajasini oshirishda muhim ahamiyat kasb etadi. Ushbu saʼy-harakatlar jamoada o‘zaro hurmat, ishonch va faollikni taʼminlashga xizmat qilmoqda.

“NKMK” AJ Matbuot xizmati