So‘nggi yillarda Navoiy kon-metallurgiya kombinatida asosiy ishlab chiqarish va boshqaruv jarayonlarining raqamli transformatsiyasi bosqichma-bosqich amalga oshirilmoqda. Raqamlashtirish strategiyasi zamonaviy axborot-kommunikatsiya texnologiyalari va avtomatlashtirilgan tizimlarni joriy etish orqali korxona faoliyatining samaradorligi, shaffofligi va barqarorligini oshirishga qaratilgan.

Kombinat bo‘linmalarida sunʼiy intellekt texnologiyalaridan foydalangan holda, texnologik jarayonlarni boshqarishning avtomatlashtirilgan tizimlari joriy etildi. Bu yechimlar ishlab chiqarish ko‘rsatkichlarini real vaqt rejimida nazorat qilish, chetlashishlarni oldindan aniqlash va inson omili taʼsirini kamaytirish imkonini bermoqda.

Xususan, 2024-yil yakunida Janubiy kon boshqarmasidagi “Zarmitan” yer osti konida shaxtadagi texnika va ishchi-xodimlarning aniq joylashuvini aniqlash imkonini beruvchi yer osti konchilik texnikalari va ishchi-xodimlarning joylashuvi, ular bilan aloqa va ogohlantirish tizimi ishga tushirildi.

Bugungi kunda ushbu tizim ishchi-xodimlarning harakatlanishi, ish vaqtini hisobga olish va texnikalarning yuklanishini nazorat qilmoqda. Bu esa shaxta sharoitlarida ishlab chiqarish xavfsizligi va shaffoflik darajasi hamda logistika samaradorligini sezilarli darajada oshirish, to‘xtab qolishlarni kamaytirishga xizmat qilmoqda. Maʼlumotlar kon dispetcherining avtomatlashtirilgan ish joyida real vaqt rejimida hamda yer osti lahimlari rejalarida 3D format orqali monitorlarda aks ettiriladi.

Janubiy kon boshqarmasi bosh muhandisining ishlab chiqarishni avtomatlashtirish bo‘yicha o‘rinbosari Alisher Normamatov taʼkidlaganidek:

“Hozirgi vaqtda ushbu tizim dasturlarini takomillashtirish ishlari davom etmoqda. Bu ishlar ventilyatorlar va nasos stansiyalari faoliyatini nazorat qilish, gazlar konsentratsiyasi darajasini aniqlash, ishchi-xodimlarni gaz to‘planishi haqida ogohlantirish va boshqa maqsadlarga qaratilgan. Kelgusi yilda “G‘ujumsoy” konini ham ushbu tizim bilan qamrab olish rejalashtirilmoqda. Shunda, yer ostidagi har bir ishchi-xodim va har bir texnika vositasi nazoratda bo‘ladi. Bundan tashqari, ishlab chiqarishni avtomatlashtirish bo‘limi mutaxassislari har bir kon uchun alohida va to‘liq dispetcherlik tizimini yaratish ustida ish olib borishmoqda.”

Shuningdek, kombinatning Markaziy loyihalash byurosi mutaxassislari bilan birgalikda “G‘ujumsoy” konida joylashuv, aloqa va ogohlantirish tizimi bo‘yicha hamda “Zarmitan” konidagi mavjud tizimni kengaytirish yuzasidan loyiha ishlab chiqildi. 4-gidrometallurgiya zavodida ishlab chiqarish samaradorligini va metall ajratib olish koeffitsiyentini oshirish uchun qo‘shimcha reaktor o‘rnatildi va u to‘liq avtomatlashtirildi. “Marjonbuloq” maydonida avtomatik avtomobil va temir yo‘l tarozilari foydalanishga topshirildi.

Raqamli transformatsiya sharoitida ishlab chiqarishni avtomatlashtirish korxonalarni rivojlantirish uchun muhim ahamiyatga ega. U nafaqat raqobatbardoshlikni oshirish, balki uzoq muddatli istiqbolda ishlab chiqarishning barqaror rivojlanishini taʼminlash imkonini beradi.

“NKMK” AJ Matbuot xizmati