25-oktabr kuni Nurobod shahridagi “Nurobod” madaniyat saroyida Janubiy kon boshqarmasi va “Sobirsoy” geotexnologik koni tashkil topganligining 60 yilligiga bag‘ishlangan bayram tantanasi o‘tkazildi.

Tantanada “NKMK” AJ Janubiy kon boshqarmasi bo‘linmalarida mehnat faoliyatini olib borayotgan turli kasb egalari va mehnat faxriylari ishtirok etishdi.

Bayram tantanasida Samarqand viloyati hokimi Erkinjon Turdimov ishtirok etib, Janubiy kon boshqarmasi va “Sobirsoy” geotexnologik koni jamoalarini yubiley bilan tabrikladi hamda Navoiy kon-metallurgiya kombinatining mamlakatimiz iqtisodiy qudratini mustahkamlash va hududlarni rivojlantirishdagi munosib hissasini e'tirof etdi. Shunigdek, bir guruh ishchi-xodimlar Samarqand viloyati hokimligi tashakkurnomalari bilan taqdirlandi.

Tadbirda “NKMK” AJ Boshqaruvi raisi – Bosh direktori Quvondiq Sanaqulov korxonalar jamoalari va mehnat faxriylarini Janubiy kon boshqarmasi va “Sobirsoy” geotexnologik konining 60 yilligi bilan muborakbod etdi.

Shuningdek, tadbirda yubiley munosabati bilan bir guruh ishchi-xodimlar ko‘p yillik fidokorona mehnati, sohani rivojlantirishga qo‘shayotgan yuksak hissasi uchun turli darajali “Konchilik shuhrati” ko‘krak nishoni va “NKMK faxriysi” unvoni bilan taqdirlandi.

Bayram tantanasida “Farhod” va “Nurobod” madaniyat saroylari ijodiy jamoalari va xonandalarining konsert dasturi namoyish etildi.

“NKMK” AJ Matbuot xizmati.