Ayni kunlarda mamlakatimizda mustaqilillik bayrami shukuhi kezmoqda. “Vatan uchun, millat uchun, xalq uchun!”, degan ezgu g‘oyani mujassam etgan bayram tadbirlari Navoiy kon-metallurgiya kombinatida ham bo‘lib o‘tmoqda. Eng ulug‘, eng aziz ayyom arafasida Zarafshon shahridagi “Oltin vodiy” madaniyat saroyida O‘zbekiston Respublikasi qurilish sohasi xodimlari kuni va Zarafshon qurilish boshqarmasi tashkil topganligining 60 yilligi keng nishonlandi.

Bayram tadbirida “NKMK” AJ Boshqaruvi raisi – Bosh direktori Q.Sanaqulov ishtirok etib, korxona jamoaci, soha xodimlari va mehnat faxriylarini kasb bayrami va Zarafshon qurilish boshqarmasining 60 yilligi bilan muborakbod etib, kombinat quruvchilarining bunyodkorlik ishlari, yutuqlarini eʼtirof etdi.

Tadbirda taʼkidlanganidek, muhtaram Yurtboshimiz Shavkat Mirziyoyevning tashabbuslari bilan qabul qilingan dasturlar, yaratib berilayotgan shart-sharoitlar tufayli kombinatda keyingi yillarda amalga oshirilgan yirik investitsion loyihalar asosida zamonaviy korxonalar – 4 ta yangi zavod va boshqa ko‘plab tarmoqlar ishga tushirildi. Ishlab chiqarish tegirmonlari va zarur jihozlarni montaj qilish, ishga tushirish va binolarni bunyod etish ishlari bir paytning o‘zida olib borilishi tufayli loyihalarni foydalanishga topshirish muddatini qisqartirish imkonini bermoqda. Bu ishlarda 2,7 ming nafarga yaqin muhandis-quruvchilar, ishchi-xodimlar mehnat qilayotgan Zarafshon qurilish boshqarmasining ham munosib hissasi bor.

Shuningdek, tadbirda O‘zbekiston Respublikasi Qurilish va uy-joy kommunal xo‘jaligi vazirining o‘rinbosari O.Jo‘rayeva, Zarafshon shahar hokimi N.Raxmanovlar ishtirok etib, qurilish sohasini rivojlantirishga munosib hissa qo‘shib kelayotgan soha xodimlarini kasb bayrami va Zarafshon qurilish boshqarmasining 60 yilligi bilan tabriklashdi.

Kasb bayrami hamda yubiley munosabati bilan bir guruh quruvchilar ko‘p yillik fidokorona mehnati, sohani rivojlantirishga qo‘shayotgan yuksak hissasi uchun kombinat tomonidan “NKMK faxriysi” unvoni, “Konchilik shuhrati” ko‘krak nishonlari hamda Qurilish va uy-joy kommunal xo‘jaligi vazirligi, Zarafshon shahar hokimligining faxriy yorliqlari, tashakkurnomalari va qimmatbaho sovg‘alari bilan taqdirlandi.

Bayram tantanasida kombinat madaniyat muassasalarining ijodiy jamoalari va xonandalari ishtirokida konsert dasturi namoyish etildi.

“NKMK” AJ Matbuot xizmati