NKMK yoshlar yetakchilari Kengashi va kasaba uyushmasi Kengashi hamkorligida Xalqaro shaxmat maktabida o‘tkazilgan o‘quv-amaliy seminar kombinatda jamoatchilik asosida faoliyat yuritayotgan boshlang‘ich tashkilot yetakchilari uchun yorqin taassurotlarga boy bo‘ldi.

“Navoiy kon-metallurgiya kombinati” AJ Boshqaruvi raisi – Bosh direktori Quvondiq Sanaquloning yoshlar bilan uchrashuvi bo‘lib o‘tdi.

Ochiq muloqot shaklda o‘tgan uchrashuvda kombinat rahbari Yangi O‘zbekistonda olib borilayotgan yoshlarga oid davlat siyosati, yaratib berilayotgan imkoniyatlar, yoshlar zimmasidagi ulkan masʼuliyat va vazifalar yuzasidan fikr-mulohazalari va tavsiyalarini bildirdi.

- Muhtaram Yurtboshimiz rahnamoligida yoshlarimizga taʼlim olish, xorijiy tillarni o‘rganish, kasb egallash, hayotdan o‘zlarining munosib o‘rinlarini topishlari uchun barcha zaruriy sharoitlar yaratib berilmoqda. O‘z navbatida, yosh avlodga ko‘rsatilayotgan bunday eʼtibor va g‘amxo‘rlik ertamiz egalarining faolligini oshirish hamda ularning orzularini ro‘yobga chiqarishga xizmat qilayotgani, ayni haqiqatdir. Bunga javoban, har biringiz o‘z oldingizga katta maqsadlarni qo‘yib, ilm cho‘qqilarini egallash, yetakchilik qobiliyatini ko‘rsatishdan aslo to‘xtamasligingiz kerak. Kombinat yoshlari ishlab chiqarish bo‘ladimi, ilm-fan bo‘ladimi, albatta, har jabhada lider va yetakchi bo‘lishiga ishonaman. Yana bir bor taʼkidlayman: sizlarning har qanday kreativ g‘oya va tashabbuslaringiz hamda loyihalaringizni qo‘llab-quvvatlashga tayyorman, - dedi o‘z chiqishida Q.Sanaqulov.

Maʼlumot uchun qayd etish joizki, bugungi kunda “NKMK” AJ da 30 yoshgacha bo‘lgan 12 ming nafardan ortiq yoshlar faoliyat olib bormoqda. Shundan, 4,2 ming nafarini oliy maʼlumotlilar, 941 nafarini xotin-qizlar va 348 nafarini yosh rahbarlar tashkil etadi.

Uchrashuvda yoshlar, o‘z navbatida, yaratilayotgan bunday keng imkoniyatlardan unumli foydalanib, o‘zlarini to‘la namoyon etishga ishonch bildirdi.

Bosh direktor kun tartibidagi dolzarb masalalarni muhokama etib, kelgusida amalga oshirilishi lozim bo‘lgan yo‘nalishlar bo‘yicha yoshlarga kerakli tavsiyalari hamda tegishli masʼullarga zaruriy ko‘rsatmalarini berdi.

O‘zaro savol-javob tarzda o‘tgan tadbir so‘ngida bir guruh faol yetakchilarga kitoblar sovg‘a qilindi.

“NKMK” AJ Matbuot xizmati