Navoiy kon-metallurgiya kombinatida transport sohasini rivojlantirishga alohida eʼtibor qaratilmoqda. So‘nggi yillarda kombinat bo‘linmalarida og‘ir yuk tashuvchi avtoag‘dargichlar va konchilik texnikalari tarkibi muntazam yangilanib borilayapti.

Xususan, Janubiy kon boshqarmasining 10-avtokorxonasida uzoq yillar foydalanilgan texnikalar zamonaviy, yuqori texnik-iqtisodiy ko‘rsatkichlarga ega transport vositalariga bosqichma-bosqich almashtirilmoqda. Yaqinda ushbu korxonaga “Zarmitan” sanoat maydonidagi “O‘rtaliq” ochiq konida foydalanish uchun yuk ko‘tarish quvvati 55 tonna bo‘lgan 3 ta “Komatsu” rusumli avtoag‘dargich keltirildi.

- Avtokorxonamizda 300 nafardan ortiq ishchi-xodim mehnat faoliyatini olib bormoqda. Haydovchilarimiz turli rusumdagi avtotransport vositalari, shu jumladan og‘ir yuk tashuvchi avtoag‘dargichlarni boshqarishadi. Endilikda “O‘rtaliq” ochiq konidan qazib olingan tog‘ jinslarini 4-gidrometallurgiya zavodiga qayta ishlash uchun tashish jarayonida zamonaviy, yuqori ish unumdorligiga ega “Komatsu” rusumli avtoag‘dargichlaridan foydalanayapmiz. Joriy yilning 1-yarim yilligida “Zarmitan”, “G‘ujumsoy” va “O‘rtaliq” konlaridan 2,75 mln. tonna tog‘ jinslari, 29 ming nafar yo‘lovchi tashildi, - deydi Janubiy kon boshqarmasining 10-avtokorxonasi boshlig‘i Bobomurod Hamdamov.

Ishlab chiqarish jarayonida zamonaviy avtoag‘dargichlar va konchilik texnikalaridan foydalanish ish samaradorligini oshirish bilan birga haydovchilarga qulay ish sharoitlarini yaratmoqda.

“NKMK” AJ Matbuot xizmati