So‘nggi yillarda ilm-fan va ishlab chiqarish integratsiyasi yo‘nalishida Navoiy kon-metallurgiya kombinati hamda Navoiy davlat konchilik va texnologiyalar universiteti olimlari tomonidan kombinatning Markaziy ilmiy-tadqiqot laboratoriyasida qator ilmiy izlanishlar olib borildi.

Natijada Markaziy ilmiy-tadqiqot laboratoriyasi tarkibida 2021-yilda tashkil etilgan “Suv taʼminoti muammolarini yechish” laboratoriyasi 20 dan ortiq kimyoviy elementlarni aniqlashga mo‘ljallangan zamonaviy asbob-uskunalar bilan taʼminlandi. Joriy yilning oktabr oyida mazkur laboratoriya negizida universitet Kimyo-metallurgiya fakultetining “Kimyoviy texnologiya” kafedrasi filiali faoliyati yo‘lga qo‘yilib, amaliy mashg‘ulotlar jarayoni boshlandi.

- Mazkur kafedra filialida 6 nafar prfessor-o‘qituvchi hamda 100 nafardan ziyod talaba amaliyotni o‘taydi hamda laboratoriya sharoitida suv tanqisligi muammolari bo‘yicha tadqiqotlarni olib borishadi. Shuningdek, kombinat gidrometallurgiya zavodlarining chiqindi saqlash omborlarida texnik suvni tozalash va ekologik qayta ishlash imkoniyatlari tahlil etib boriladi, - deydi “Suv taʼminoti muammolarini yechish” laboratoriyasi boshlig‘i Shavkat Salimov.

Ilm-fan va ishlab chiqarish integratsiyasining amaliy namunasi bo‘lgan ushbu filialning faoliyati nafaqat talabalarning amaliy ko‘nikmalarini mustahkamlash, balki ularni ishlab chiqarish muhitiga yaqinlashtirish, ilmiy izlanishlarga jalb etish hamda sohada raqobatbardosh mutaxassislar tayyorlashga xizmat qiladi.

“NKMK” AJ Matbuot xizmati