Navoiy kon-metallurgiya kombinatida mahalliylashtirilgan va import o‘rnini bosuvchi mahsulotlarni ishlab chiqarish yo‘nalishida olib borilayotgan ishlar ko‘lami, iqtisodiy samaradorlik hajmi yildan-yilga kengayib bormoqda.

Misol uchun, “NKMK” AJ tomonidan 2019-2024-yillarda jami 3,1 trln. so‘mlik mahalliylashtirilgan mahsulotlar o‘zlashtirilib, ishlab chiqarish hajmi 2,7 barobarga oshdi. 2025-yilda kombinatda mahalliylashtirilgan mahsulotlar ishlab chiqarish hajmini 1,4 trln. so‘mga yetkazish rejalashtirilgan. Birgina, joriy yilning I choragida Mahalliylashtirish dasturi doirasida qariyb 350 mlrd. so‘mlik mahsulot ishlab chiqarildi. Bu, o‘tgan yilning mos davriga nisbatan 1,5 barobar ko‘p demakdir. Xususan, loyihalar orasida yirik o‘lchamli maʼdanlarni maydalash tegirmonlarini ishlab chiqarish eng katta vazifalardan biri hisoblanadi.

– Mahalliylashtirish dasturi doirasida loyihalarni amalga oshirishda kombinatning har bir bo‘linmasi munosib hissasini qo‘shmoqda. Jumladan, mahalliylashtirilgan mahsulotlarni ishlab chiqarishda asosiy bo‘linma bo‘lgan Navoiy mashinasozlik zavodining hissasi beqiyos. Joriy yilda bu korxonada 1,1 trln. so‘mlik mahalliylashtirilgan mahsulotlarni ishlab chiqarish ko‘zda tutilgan. Bunda, nafaqat asosiy faoliyat uchun ehtiyojdagi mahsulotlar, balki kombinatda olib borilayotgan investitsion loyihalar uchun nostandart, texnologik jihatdan murakkab uskunalar ishlab chiqarilmoqda, – deydi “NKMK” AJ Mahalliylashtirish dasturlarini shakllantirish va monitoring qilish bo‘limi boshlig‘i Ulug‘bek Sanaqulov.

Yaqin vaqtlargacha Navoiy mashinasozlik zavodida hajmi kichik bo‘lgan sharli tegirmonlar qayta taʼmirlangan bo‘lsa, oxirgi sakkiz yilda kombinat mutaxassislari ilmiy izlanishlari asosida gidrometallurgiya zavodlari uchun xalqaro texnologik standartlarga mos keladigan yirik o‘lchamdagi sharli tegirmonlarning bir necha turlari o‘zlashtirildi.

Joriy yilda ham “7-gidrometallurgiya zavodining qayta ishlash quvvatini kengaytirish” investitsion loyiha doirasida kombinat mutaxassislari tomonidan ilk bor yangicha o‘lchamdagi, hajmi 5,5x8,5 metr bo‘lgan maydalash tegirmoni va 7,0x2,3 metr o‘lchamli to‘liq jihozlangan maydalash tegirmonini tayyorlashga erishildi.

Bugungi kunda kombinatda Mahalliylashtirish dasturi ijrosi haqida so‘z ketganda, uning tarkiy bo‘linmalarida ushbu yo‘nalishda olib borilayotgan ishlar alohida ahamiyatga ega. Misol uchun, kombinatning eng yirik va yetakchi bo‘linmasi – Markaziy kon boshqarmasida olib borilayotgan ishlar alohida eʼtirofga sazovor. Zarafshon taʼmirlash-mexanika zavodi ana shunday faoliyat ko‘lamini kengaytirib borayotgan korxonalardan biridir. Zavodda hozirda ehtiyot qismlar, lentali konveyerlar, nostandart uskunalar hamda metall konstruksiyalar ishlab chiqarish yo‘lga qo‘yilgan. Shuningdek, Shimoliy kon boshqarmasining Kon jihozlarini taʼmirlash sexi, Janubiy kon boshqarmasining Taʼmirlash-mexanika sexi, “Qizilqum” kon boshqarmasining “Pistali” koni Kon va texnologik jihozlarni taʼmirlash uchastkasi hamda Ishlab chiqarishni avtomatlashtirish boshqarmasida ham bu yo‘nalishda keng ko‘lamli ishlar olib borilmoqda.

Bir so‘z bilan aytganda, kombinatda mahalliylashtirish darajasi bugungi kunda 60 foizdan yuqori. Mavjud xomashyo, ishlab chiqarish, ilmiy-texnik va mehnat salohiyatini tahlil qilish asosida yangi loyihalarni amalga oshirish hamda amaldagi loyihalar bo‘yicha mahalliylashtirish darajasini yanada oshirish bo‘yicha ilmiy-amaliy ishlar kelgusida ham davom ettiriladi.

“NKMK” AJ Matbuot xizmati