“Navoiy kon-metallurgiya kombinati” AJ vakillari kon-transport texnikasida dispetcherlik tizimlarini joriy etish va ulardan foydalanish bo‘yicha tajriba almashish maqsadida Qozog‘iston Respublikasidagi “KAZ Minerals” kompaniyasining “Bozshakol” mis koniga tashrif buyurdi.

Tashrif davomida transformatsiya boshqarmasi, kombinat boshqarmasi konchilik bo‘limi, Shimoliy kon boshqarmasi mutaxassislari ushbu tizimlarning ishlash tamoyillari va ulardan foydalanishning afzalliklari bilan tanishdilar. “Bozshakol” koni vakillari texnologiyalarni ishlatish bo‘yicha amaliy tavsiyalar berib, ularni joriy etish jarayonida duch kelgan muammolar haqida so‘zlab berishdi.

Kombinat mutaxassislari olgan amaliy ko‘nikmalar konchilik ishlarida shunga o‘xshash yechimlarni ishlab chiqish va joriy etishda muhim ahamiyat kasb etadi. Xususan, burg‘ilash dastgohlaridan yuqori aniqlikda foydalanish ish unumdorligini oshirish, xarajatlarni kamaytirish imkonini beradi hamda texnologiyani kombinat korxonalarida qo‘llash uchun xizmat qiladi.

Tashrif yakunida “NKMK” AJ va “KAZ Minerals” kompaniyasi vakillari o‘zaro tajriba almashish va hamkorlikni yanada rivojlantirishdan manfaatdor ekanliklarini bildirishdi.

“NKMK” AJ Matbuot xizmati.