Navoiy kon-metallurgiya kombinatida geologiya-qidiruv va mineral resurslarni baholash sohasida mutaxassislarning kasbiy ko‘nikmalarini rivojlantirish hamda ilg‘or xalqaro tajribalarni joriy etish bo‘yicha ishlar tizimli ravishda davom ettirilmoqda.

Navoiy shahridagi “NKMK” AJ O‘quv markazida Mineral-xomashyo resurslari bo‘limi mutaxassislari uchun “Konlarni modellashtirish va baholashning jahon amaliyoti va metodikasi” mavzusida mahorat darsi bo‘lib o‘tdi. Mahorat darsi “AMC Consultants” kompaniyasi bosh geologi, geologik modellashtirish va mineral resurslarni baholash sohasidagi xalqaro ekspert Dmitriy Pertel ishtirokida o‘tkazildi.

Tadbir ishtirokchilari konlarni modellashtirish bo‘yicha ilg‘or yondashuvlar, ularning geologik tuzilishining o‘ziga xos xususiyatlari va geologiya-qidiruv ishlari maʼlumotlarini talqin qilish bilan tanishdi. Maʼdanlarning geologik va blokli modellarini tuzish uslubi hamda mineral resurslarni baholashning amaliy jihatlariga alohida eʼtibor qaratildi.

Ushbu tadbirda berilgan amaliy tavsiyalar geologiya-qidiruv jarayonlarini yanada takomillashtirish, geologik maʼlumotlarni talqin qilish sifatini oshirish hamda kombinat faoliyatiga ilg‘or xalqaro tajribalarni joriy etishga xizmat qiladi.

“NKMK” AJ Matbuot xizmati