Navoiy kon-metallurgiya kombinatida kadrlarni qayta tayyorlash, muhandis-texnik xodimlar malakasini sohasi bo‘yicha oshirish tizimli yo‘lga qo‘yilgan.

Xususan, “NKMK” AJ Resurslar departamenti mutaxassislari uchun geologiya-qidiruv maʼlumotlarini boshqarish va mineral resurslarni baholash bo‘yicha o‘quv kursi bo‘lib o‘tdi. Ushbu o‘quv kursi “Cristmann Geologische Beratung” kompaniyasi vakili, geologiya-qidiruv ishlari va mineral resurslarni baholash sohasidagi xalqaro ekspert Ilya Kristmann ishtirokida o‘tkazildi.

Kombinat mutaxassislari geologiya-qidiruv ishlarini o‘tkazish va natijalarini qayta ishlashda sifatni nazorat qilish, geologik maʼlumotlarni taqqoslash, geologiya-texnologik xaritalash, mineral resurslar va maʼdan zaxiralarini xalqaro standartlarga muvofiq tasniflash bo‘yicha amaliy ko‘nikmalarga ega bo‘lishdi.

Ushbu o‘quv ko‘rsida berilgan amaliy tavsiyalar geologiya-qidiruv jarayonlarini yanada takomillashtirish, geologik maʼlumotlarni talqin qilish sifatini oshirish hamda kombinat faoliyatiga ilg‘or xalqaro tajribalarni joriy etishga xizmat qiladi.

“NKMK” AJ Matbuot xizmati