Navoiy kon-metallurgiya kombinatida oltin tarkibli maʼdanni tashishda muhim ahamiyatga ega bo‘lgan temir yo‘l infratuzilmasini yaxshilash, yangi temir yo‘llar qurish, mavjud liniyalarni rekonstruksiya qilish yuzasidan qator ishlar amalga oshirilmoqda.

“Muruntov” konida Markaziy kon boshqarmasiga qarashli Temir yo‘l transporti boshqarmasi tomonidan qisqa muddat ichida “Shimoliy” maʼdan yuklash punkti qurilib, ishga tushirildi. Mazkur punktning foydalanishga topshirilishi “Muruntov” konidan qazib olinayotgan maʼdanni 2-gidrometallurgiya zavodiga yetkazish hamda zavodda maʼdanni qayta ishlash hajmini oshirish uchun muhim ahamiyat kasb etadi.

- Ushbu loyiha doirasida kombinat temiryo‘lchilari tomonidan 1,2 kilometrdan ortiq masofada temir yo‘l yotqizildi va 3 ta strelkali o‘tkazgich qurildi. “Shimoliy” maʼdan yuklash punkti orqali oyiga qariyb 500 ming tonna maʼdanni 2-gidrometallurgiya zavodiga tashish imkoniyati yaratildi, - deydi Temir yo‘l transporti boshqarmasi bosh muhandisi S.Nazarov.

Bu kabi ishlar temir yo‘l orqali yuk tashish jarayonida teplovozlar harakatini tashkil qilishda yuzaga keladigan ortiqcha vaqt sarfini kamaytirish hamda yoqilg‘i-moylash mahsulotlarini iqtisod qilishga xizmat qiladi.

“NKMK” AJ Matbuot xizmati