Navoiy kon-metallurgiya kombinatida ishlab chiqarish jarayonlarining uzluksizligini taʼminlash, konlardan qazib olinayotgan oltin tarkibli maʼdanni gidrometallurgiya zavodlariga tashish, ishchi-xodimlarni manzillarga yetkazishda temir yo‘l transporti muhim o‘rin tutadi.

Xususan, kombinat ishchi-xodimlari uchun munosib mehnat sharoitlarini yaratish maqsadida 2025-yilda Markaziy kon boshqarmasining Temir yo‘l transporti boshqarmasiga ishchi-xodimlarni Zarafshon shahridan “Muruntov” stansiyasiga tashish uchun 15 ta zamonaviy yo‘lovchi vagon keltirildi. 2026-yilda ham teplovoz va vagonlarni yangilash ishlari davom ettiriladi. Yaqin vaqt ichida 6 ta manevr, 2 ta magistral teplovoz va 100 dan ortiq yuk tashish vagonlarni foydalanishga topshirish hamda temir yo‘l liniyalarini qurish, joriy taʼmirlash va saqlash ishlarida foydalanish uchun yangi texnikalarni keltirish rejalashtirilgan.

So‘nggi yillarda kombinat tomonidan yangi temir yo‘l liniyalarini qurish, mavjud infratuzilmani modernizatsiya qilish, lokomotiv va vagonlar parkini bosqichma-bosqich yangilash bo‘yicha olib borilgan ishlar yuk tashish hajmini oshirish hamda transport xarajatlarini qisqartirishga xizmat qilmoqda. Jumladan, 2025-yilda 72,5 mln. tonna maʼdan gidrometallurgiya zavodlariga tashilgan bo‘lsa, joriy yilda ushbu ko‘rsatkichni 74,5 mln. tonnaga yetkazish mo‘ljallangan.

- 2026-yilda temir yo‘l transporti faoliyatining samaradorligini oshirish, harakat xavfsizligini taʼminlash hamda zamonaviy logistika tizimini shakllantirishga qaratilgan qator chora-tadbirlar amalga oshirilishi rejalashtirilgan. Ayniqsa, infratuzilmani yangilash va texnik imkoniyatlarni kengaytirishga alohida eʼtibor qaratilmoqda. Shu maqsadda temir yo‘l infratuzilmasini bosqichma-bosqich modernizatsiya qilish ishlari amalga oshirilmoqda. Bugungi kunda kombinat tomonidan 5-gidrometallurgiya zavodi va “Auminzo-Amantoy” koni oralig‘ida 8 kilometrlik yangi temir yo‘l liniyasini qurish bo‘yicha loyiha amalga oshirilmoqda, - deydi “NKMK” AJ Temir yo‘l transporti bo‘limi boshlig‘i Zafar Sayemov.

Temir yo‘l transportida profilaktik taʼmirlash ishlarini raqamlashtirish, harakatni boshqarishda avtomatlashtirilgan tizimlarni joriy etish orqali ekspluatatsiya samaradorligini oshirish va texnik nosozliklarning oldini olishga qaratilgan chora-tadbirlar ham bajarilmoqda. Joriy yilda temir yo‘l sohasida faoliyat yuritayotgan 300 nafarga yaqin ishchi-xodimlar uchun zamonaviy texnika va texnologiyalar bilan ishlash ko‘nikmalarini rivojlantirishga qaratilgan o‘quv mashg‘ulotlari o‘tkaziladi.

Kombinat temir yo‘l transporti tizimini rivojlantirish, texnika parkini yangilash yo‘lida olib borilayotgan bu kabi ishlar korxonada qimmatbaho metallar ishlab chiqarish hajmini oshirishga xizmat qilmoqda.

“NKMK” AJ Matbuot xizmati