Bugun Toshkent shahrida O‘zbekiston Respublikasi Oila va xotin-qizlar qo‘mitasi tomonidan o‘tkazilgan “Yil ayoli” ko‘rik-milliy tanlovining Respublika bosqichi g‘oliblarini taqdirlash marosimi bo‘lib o‘tdi.

Mazkur tanlovning tuman, viloyat bosqichlarida 1-o‘rinni qo‘lga kiritgan Navoiy kon-metallurgiya kombinati vakili – Shimoliy kon boshqarmasi Markaziy fizika-kimyoviy laboratoriyasi mikrobiologiya guruhi rahbari Ramilya Rangova tanlovning respublikasi bosqichida ham “Yangi g‘oyalar tashabbuskori” nominatsiyasida g‘oliblikka sazovor bo‘ldi.

O‘z sohasining malakali mutaxassisi, uchquduqlik Ramilya Rangova 2005-yildan boshlab kombinatda faoliyat olib bormoqda. 2022-yilda uning tomonidan laboratoriyada fizika-kimyoviy usulda namunalar tarkibidagi foydali elementlar miqdorini aniqlash jarayonida keng foydalaniladigan tigel (maxsus idish)ni mahalliylashtirish bo‘yicha ratsionalizatorlik taklifi ishlab chiqildi va ishlab chiqarishga muvaffaqiyatli joriy etildi.

Mehnati, tashabbuslari va yangi g‘oyalari bilan ko‘plab xotin-qizlarga o‘rnak bo‘layotgan Ramilya Rangovani yuksak natija bilan tabriklaymiz va kelgusidagi ishlariga ulkan zafarlar tilaymiz!

“NKMK” AJ Matbuot xizmati