Yaqinda poytaxtimizda Toshkent xalqaro suv forumi (Tashkent Water Week) bo‘lib o‘tdi. O‘zbekiston Respublikasi hukumati tomonidan tashkil etilgan ushbu yirik tadbirda mahalliy va xorijiy ekspertlar, olimlar va mutaxassislar ishtirok etdi. Mazkur forumda “Navoiy kon-metallurgiya kombinati” AJ vakillari ham qatnashdi.

Forumda suv taʼminoti va sug‘orishga bo‘lgan talabning ortishi tufayli Markaziy Osiyoda suv resurslari tanqisligi tobora ortib borayotgani, bunday sharoitda suv resurslarini samarali boshqarish strategik ustuvor vazifa ekani, bu esa mintaqaviy hamkorlikni mustahkamlash chora-tadbirlari talabini qo‘yayotganini alohida qayd etdi.

Maʼlumki, suv resurslari bugungi kunda nafaqat ekologik, balki iqtisodiy va geosiyosiy ahamiyatga ega strategik omil hisoblanadi. Ayniqsa, Markaziy Osiyo sharoitida suv zaxiralarining cheklanganligi, aholi soni va qishloq xo‘jaligi ehtiyojlarining ortib borishi dolzarb masalaga aylanmoqda. Zamonaviy yondashuv nuqtai nazaridan, suv resurslaridan samarali foydalanish faqat infratuzilmani yaxshilash bilan cheklanmaydi. Bu, avvalo, kompleks boshqaruvni, raqamli texnologiyalarni joriy etishni va suv sarfini aniq hisob-kitob asosida nazorat qilishni talab etadi.

- Suv resurslaridan samarali foydalanish asosan Qizilqum sahrosida faoliyat yuritayotgan Navoiy kon-metallurgiya kombinati uchun ustuvor vazifa hisoblanadi. O‘tgan yili kombinatning 2040-yilgacha bo‘lgan davrda va uzoqroq istiqbolda suvdan samarali foydalanish strategiyasi qabul qilingan edi. Ushbu strategik ishlanma suv resurslaridan oqilona foydalanishni taʼminlash, kombinatning ekologik va texnologik barqarorligini oshirish, “yashil iqtisodiyot” bilan bog‘liq innovatsion yechimlar va strategik yondashuvlarni joriy etishga qaratilgan. Mazkur strategiyada zamonaviy ekologik, iqtisodiy va ijtimoiy talablarga javob beradigan suvdan oqilona foydalanishning uzoq muddatli dasturini shakllantirish imkonini beruvchi chuqur ilmiy strategik tahlil, tizimli yondashuv va vazifalarning kompleks ko‘rinishi taqdim etilgan, - deydi “NKMK” AJ bosh energetik o‘rinbosari I.Shukurlayev.

Tadbirda taʼkidlaganidek, forumning asosiy vazifasi mintaqaviy hamkorlikni yana-da mustahkamlash va Markaziy Osiyoda suv resurslaridan samarali foydalanish hamda iqtisodiy barqarorlikni taʼminlaydigan zamonaviy modellarni rivojlantirishdir. Forumda suv taʼminotidagi zamonaviy texnologiyalar va raqamli innovatsiyalar, suv resurslarini boshqarishdagi global tendensiyalar va dolzarb muammolar hamda oziq-ovqat xavfsizligida suvning ahamiyati va tarmoqlararo hamkorlikni rivojlantirish masalalari muhokama qilindi.

“NKMK” AJ Matbuot xizmati