Konchilik sohasi yer osti boyliklarini o‘zlashtirishda muhim tarmoq hisoblanadi. Navoiy kon-metallurgiya kombinatida tog‘ jinslari ochiq va yer osti kon ishlarini olib borish jarayonida qazib olinib, qimmatbaho metallar ishlab chiqarish uchun xomashyo bazasi bo‘lib xizmat qilmoqda.

Bu ishlarni amalga oshirish ham mashaqqatli, ham sharafli. Ayniqsa, oltin tarkibli maʼdanni yer ostidan qazib olish o‘ta murakkabdir. Buning misoli sifatida aytish mumkinki, yildan-yilga chuqurlashib borayotgan konlarda tog‘ jinslarini yopiq usulda qazib olishda eng samarali yechim sifatida “Zarmitan” konida “Skipli” shaxta stvoli ishga tushirilgani muhim qadam bo‘ldi.

Keyingi sakkiz yilda yangi konlarni o‘zlashtirish, maʼdan qayta ishlash quvvatlarini oshirish bo‘yicha amalga oshirilgan yirik investitsion loyihalar ishlab chiqarish hajmini oshirmoqda. Yirik loyihalardan – “Muruntov” konini o‘zlashtirishning V navbati (1-bosqich), “Qoqpatas” va “Dovg‘iztov” oltin konlarida maʼdan qazib olish (III navbati), “Zarmitan” konining quyi gorizontlarini o‘zlashtirish (0,00 m. gorizontgacha), “Pistali” konida oltin tarkibli maʼdanlarni qazib olish va qayta ishlash majmuasini qurish (6-GMZ), yangi ochilgan konlardan – “Pistali”, “Turbay”, “Tomdibuloq” va “Balpantov” bunga misoldir.

- Kombinatda tog‘ jinslarini qazib olish hajmi yildan yilga o‘sib bormoqda. Misol uchun, 2015-yilda kombinat bo‘yicha 107 mln. kubometr tog‘ jinslari va 50,6 mln. tonna maʼdan qazib olingan bo‘lsa, 2024-yilda bu ko‘rsatkich 284,6 mln. kubometr tog‘ jinslari va 94,7 mln. tonna maʼdanni tashkil etdi. Bugungi kunda “Muruntov”, “Sharqiy”, “Dovg‘iztov”, “Turbay”, “Pistali”, “Auminzo-Amantoy”, “Zarmitan” va “G‘ujumsoy” istiqbolli konlardan hisoblanadi. Misol sifatida aytish mumkinki, birgina “Muruntov” konida joriy yilda 97,9 mln. kubometr tog‘ jinslari qazib olish rejalashtirilgan, - deydi “NKMK” AJ Konchilik bo‘limi boshlig‘i Temur Xudoyarov.

Korxona mutaxassislari tomonidan konchilik sohasiga doir texnologik yondashuvlar, innovatsion yechimlar, ratsionalizatorlik takliflar, zamonaviy axborot-kommunikatsiya texnologiyalari joriy etilishi, ishlab chiqarishni avtomatlashtirish va raqamlashtirish ish samaradorligini oshirish, mehnat muhofazasi va xavfsizlik texnikasini taʼminlashga xizmat qilmoqda.

“NKMK” AJ Matbuot xizmati.