Navoiy kon-metallurgiya kombinatida ishlab chiqarilayotgan yangi turdagi mahalliylashtirilgan va import o‘rnini bosuvchi mahsulotlar nomenklaturasi va sifatini oshirish, korxona bo‘linmalarida tajriba-konstruktorlik ishlarining tizimini rivojlantirish maqasadida, o‘tgan yildan boshlab kombinatda Konstruktorlar kengashi faoliyati yo‘lga qo‘yildi.

15 nafar aʼzo hamda 9 ta loyihalashtirish guruhidan iborat Konstruktorlar kengashiga Navoiy mashinasozlik zavodi bosh muhandisi K.Abdullayev raislik qilib kelmoqda. Mazkur kengash tarkibiga kombinat bosh mexanigi o‘rinbosari, kon boshqarmalari bosh mexaniklari va konstruktorlik bo‘limlarining rahbarlari, Innovatsion rivojlanish departamenti va Navoiy mashinasozlik zavodi vakillari, Markaziy loyihalash byurosi va Markaziy ilmiy-tadqiqot laboratoriyasi bosh muhandislari hamda avtotransport, energetika, texnologiya yo‘nalishlari masʼullari kiradi.

- Konstruktorlar kengashi loyihalashtirish, texnologiya va materiallarni takomillashtirish bo‘yicha tavsiflarni ishlab chiqish, yangi muhandislik yechimlarni ishlab chiqarishga joriy etish, texnologik jarayonlarga zamonaviy avtomatlashtirilgan tizim va asbob-uskunalarni tatbiq etishga ko‘maklashish kabi asosiy vazifalarni bajarib kelmoqda. Kengash faoliyatiga kombinat bo‘linmalaridan 100 nafardan ortiq yosh muhandis-konstruktorlar jalb etilgan, - deydi kengash kotibi B.G‘afforov.

So‘nggi yillarda kombinat mutaxassislari Mahalliylashtirish dasturi doirasida gidrometallurgiya zavodlarida ishlatiladigan yirik hajmdagi tegirmonlarni loyihalashtirish va ishlab chiqarishda katta tajribaga ega bo‘lishdi. O‘tgan yili Navoiy mashinasozlik zavodida 11 ta turli o‘lchamdagi maydalash tegirmoni tayyorlanib, kombinat bo‘linmalariga yetkazib berilgani bunga misoldir. Bu boradagi ishlarni yana-da kengaytirish maqsadida, bugungi kunda Konstruktorlar kengashi tomonidan “SBSh-250” rusumli burg‘ilash uskunasi, “EKG-5” rusumli elektr tokida ishlaydigan ekskavator chizmalarini loyihalashtirish bo‘yicha ishlar olib borilmoqda.

Shuningdek, kombinat korxonalarida texnologik uskunalarni barqaror ishlashini taʼminlash va mavjud muammolarni bartaraf etish hamda yosh muhandislarni ixtirochilikka jalb qilish bo‘yicha Konstruktorlar kengashi tomonidan Innovatsion rivojlanish departamenti, Navoiy mashinasozlik zavodi, Navoiy davlat konchilik va texnologiyalar universiteti bilan hamkorligida o‘quv-amaliy yig‘ilishlar tashkil etilmoqda. Bugungacha bu kabi yig‘ilishlar Markaziy va Shimoliy kon boshqarmalari bo‘linmalarida o‘tkazildi.

O‘quv-amaliy yig‘ilishlarda Konstruktorlar kengashi tomonidan olib borilayotgan ishlarning mazmun-mohiyati tushuntirilib, ishlab chiqarish jarayonida yuzaga kelishi mumkin bo‘lgan muammolarni yechish uchun innovatsion ishlanmalarni joriy qilish, texnologiyalarni takomillashtirish, o‘ndan ortiq konstruktorlik yo‘nalishida tajriba almashish kabi masalalar ko‘rib chiqildi. Bunda, ilmiy tadqiqot ishlarini yanada keng joriy etish uchun Navoiy davlat konchilik va texnologiyalar universiteti bilan hamkorlikni kuchaytirish muhimligi qayd etildi. Shu bilan birga, ushbu yig‘ilishlarda kombinatga iqtisodiy samara olib keladigan loyihalar mualliflari va ishtirokchilarini rag‘batlantirish mexanizmlari tushuntirildi.

“NKMK” AJ Matbuot xizmati