Oldin xabar berganimizdek, Toshkent shahrida 28-29-oktabr kunlari o‘tkazilgan 19-Xalqaro “Tog‘-kon ishi, metallurgiya va metallsozlik – MiningMetals Uzbekistan 2025” ko‘rgazmasi doirasida O‘zbekiston Respublikasi Tog‘-kon sanoati va geologiya vazirligi ko‘magida 7-O‘zbekiston xalqaro kon-metallurgiya forumi (UIMF 2025) bo‘lib o‘tdi.

Mazkur forum “Tog‘-kon sanoatining strategik tashabbuslar orqali barqaror rivojlanishi” mavzusida o‘tkazilganligi mintaqaviy va xalqaro hamkorlikni mustahkamlash uchun muhim yahamiyatga ega. Tadbirda dunyoning 17 ta mamlakatidan 50 nafardan ortiq maʼruzachi va 450 nafardan ziyod vakil ishtirok etdi.

Xususan, ushbu forumda “Navoiy kon-metallurgiya kombinati” AJ vakillari tomonidan kompaniya faoliyatining barcha yo‘nalishlarini qamrab olgan keng ko‘lamli tashabbuslar taqdim etildi. Bu tashabbuslar zamonaviy texnologiyalarni joriy etish va raqamlashtirishni rivojlantirishdan tortib, sunʼiy intellektni integratsiya qilish orqali ishlab chiqarish jarayonlari samaradorligini oshirish hamda ishchi-xodimlar uchun teng imkoniyatlarni taʼminlashga qaratilgan.

Forumning yalpi majlisida bosh direktorning transformatsiya masalalari bo‘yicha birinchi o‘rinbosari Yevgeniy Antonov korxonaning xalqaro hamjamiyatga integratsiyalashuvi, ilg‘or tajribalarni joriy etish va kompaniyaning barqaror o‘sish strategiyasini amalga oshirish borasidagi yutuqlarini qayd etdi.

Shuningdek, kombinat vakillari mazkur tadbirning panel muhokamalarida maʼruzalari bilan ishtirok etishdi. Xususan, Axborot-kommunikatsiya texnologiyalari boshqarmasi boshlig‘i Bahriddin Bozorov NKMK raqamli transformatsiyasining yutuqlari va rivojlanish istiqbollari, ishlab chiqarish jarayonlarida zamonaviy raqamli texnologiyalarni qo‘llash, qazib olish va qayta ishlash jarayonlariga sunʼiy intellektni joriy etish haqida so‘z yuritdi. Operatsion samaradorlikni oshirish bo‘limi boshlig‘i Denis Nastenko ishlab chiqarish zanjirining barcha bosqichlarida operatsion samaradorlik va unumdorlikni oshirish, yo‘qotishlar va xarajatlarni kamaytirishga qaratilgan zamonaviy yondashuvlar va texnologiyalarni joriy etish bo‘yicha maʼlumotlarni taqdim etdi.

Mazkur forum doirasida tog‘-kon sanoatida gender tenglik va xotin-qizlar salohiyatini rivojlantirish masalalariga alohida eʼtibor qaratildi. Jumladan, gender tenglik va inklyuzivlik xizmati bosh mutaxassisi Nigora Amonova o‘z maʼruzasida kon-metallurgiya sohasining asosiy vazifalaridan biri ishchi-xodimlarning kasbiy o‘sishi uchun teng imkoniyatlarni taʼminlash va qulay shart-sharoitlar yaratish ekanligini taʼkidladi. Shu bilan birga, kombinatda BMTning Barqaror rivojlanish maqsadlari va ESG tamoyillari doirasida amalga oshirilayotgan ishlab chiqarish va boshqaruvda xotin-qizlarning ishtirokini kengaytirishga qaratilgan tashabbuslarni amalga oshirish, “International Women in Mining” (“IWiM” – tog‘-kon sanoatidagi Xalqaro ayollar tashkiloti) bilan xalqaro hamkorlik tajribasi taqdim etildi.

“Navoiy kon-metallurgiya kombinati” AJ vakillarining UIMF 2025 xalqaro forumida ishtirok etganligi kompaniya ochiq hamkorlik, innovatsion rivojlanish va barqaror o‘sish tamoyillarini qo‘llab-quvvatlashini yana bir bor tasdiqlaydi.

“NKMK” AJ Matbuot xizmati