30-oktabr kuni M.Lomonosov nomidagi Moskva davlat universitetining Murakkab tizimlar matematik tadqiqotlari instituti Strategik tadqiqotlar markazi vakillaridan iborat delegatsiya “Navoiy kon-metallurgiya kombinati” AJga tashrif buyurdi.

Kombinat boshqarmasida “NKMK” AJ Boshqaruvi raisi – Bosh direktori Quvondiq Sanaqulov, korxona mutaxassislari va Rossiya Fanlar akademiyasining xorijiy aʼzosi, Moskva davlat universiteti professori, iqtisodiyot fanlari doktori, akademik Vladimir Lvovich Kvint boshchiligidagi delegatsiya o‘rtasida uchrashuv o‘tkazildi.

Tadbirda kombinat rahbariyatiga akademik Vladimir Kvintning ilmiy rahbarligida ishlab chiqilgan Navoiy kon-metallurgiya kombinatining 2040-yilgacha bo‘lgan davrda va uzoqroq istiqbolda suvdan samarali foydalanish strategiyasi bo‘yicha yakuniy hisobot taqdim etildi va mazkur hujjat ijroga qabul qilindi. Ushbu strategik ishlanma suv resurslaridan oqilona foydalanishni taʼminlash, kombinatning ekologik va texnologik barqarorligini oshirish, “yashil iqtisodiyot” bilan bog‘liq innovatsion yechimlar va strategik yondashuvlarni joriy etishga qaratilgan.

Ushbu strategiyada zamonaviy ekologik, iqtisodiy va ijtimoiy talablarga javob beradigan suvdan oqilona foydalanishning uzoq muddatli dasturini shakllantirish imkonini beruvchi chuqur ilmiy strategik tahlil, tizimli yondashuv va vazifalarning kompleks ko‘rinishi taqdim etilgan.

Bugun delegatsiya vakillari Navoiy davlat konchilik va texnologiyalar universitetida o‘tkazilayotgan “Strategiyalash nazariyasi va amaliyoti” mavzusidagi VIII Xalqaro ilmiy-amaliy anjumanida ishtirok etadi.

“NKMK” AJ Matbuot xizmati