Bugungi kunda Navoiy kon-metallurgiya kombinatining har bir kon boshqarmasida mahalliylashtirilgan va import o‘rnini bosuvchi mahsulotlar ishlab chiqarish hamda konchilik asbob-uskunalarini taʼmirlash bo‘linmalari samarali faoliyat olib bormoqda.

Shunday korxonalardan biri Shimoliy kon boshqarmasining Kon jihozlarini taʼmirlash sexi bo‘lib, unda 200 nafarga yaqin ishchi-xodim ishlab kelmoqda. Mazkur sex 6 ta uchastkadan tashkil topgan. Tokarlik uchastkasida mexanik yig‘ish ishlari amalga oshiriladi, qozonxona-tayyorlov uchastkasida keyinchalik ishlov berish uchun detallar va nostandart metall konstruksiyalar tayyorlanadi. Shuningdek, konchilik va texnologik uskunalarni taʼmirlash hamda kon boshqarmasi bo‘linmalari ehtiyojlari uchun kislorod va azot ishlab chiqarish uchastkalari ham mavjud.

O‘tgan yili Mahalliylashtirish dasturi doirasida ushbu sexda 26 ta loyiha bo‘yicha 9,6 mlrd. so‘mlik mahsulot ishlab chiqarildi. Joriy yilda ham 22,1 mlrd. so‘mlik 26 ta loyihani amalga oshirish rejalashtirilgan bo‘lib, ularning 7 tasi yangi turdagi mahalliylashtirilgan mahsulotlardir. Asosan, bu ekskavatorlar, avtoag‘dargichlar va boshqa konchilik texnikalari uchun ehtiyot qismlar hamda 3-gidrometallurgiya zavodi uchun uskunalardan iborat.

Shimoliy kon boshqarmasi tarkibiga “Auminzo-Amantoy” va “Turbay” konlari, 5-gidrometallurgiya zavodi qo‘shilganligi sababli korxonada turli xil uskunalar va texnikalar soni ko‘paydi. Shu bois, Kon jihozlarini taʼmirlash sexini kengaytirish ishlari olib borilmoqda. Sex uchastkalaridan biri uzluksiz ish tartibiga o‘tkazilmoqda va “Auminzo-Amantoy” koni hududida sexning yangi uchastkasi ochilmoqda.

Hozirgi vaqtda sex zamonaviy ishlab chiqarish korxonasi bo‘lib, bu yerda ratsionalizatorlik takliflarini amalga oshirish uchun keng imkoniyatlar yaratilgan. Sex boshlig‘i Vitas Rudzyavichus yosh va istiqbolli rahbarlardan biri bo‘lib, 10 ga yaqin taklif kiritgan faol ratsionalizator hisoblanadi. 2024-yilda NKMK bo‘linmalarining yosh ishchi-xodimlari o‘rtasida o‘tkazilgan “Eng yaxshi ratsionalizatorlik taklifi” tanlovida u II darajali diplom bilan taqdirlandi.

Joriy yilda Kon jihozlarini taʼmirlash sexi tashkil etilganiga 65 yil to‘ladi. Shuni alohida taʼkidlash lozimki, bu sexda ishchi-xodimlarning tajribasi ish ko‘lamini kengaytirishga xizmat qilmoqda.

“NKMK” AJ Matbuot xizmati