Bosh Qomusimiz qabul qilinganining 33 yilligi “Konstitutsiya – inson qadri, erkinlik, tenglik va adolat garovi!” degan bosh g‘oya asosida nishonlanayotgani bejiz emas. Chunki Yangi O‘zbekiston strategiyasida belgilangan ustuvor yo‘nalishlarni o‘zida mujassam etgan yangi tahrirdagi Konstitutsiyamiz fuqarolarimiz va jamiyatimiz hayotida beqiyos ahamiyat kasb etmoqda.

Yangi O‘zbekistonni bunyod etish yo‘lida Prezidentimiz Shavkat Mirziyoyev rahnamoligida ortga qaytmas demokratik islohotlar izchil amalga oshirilmoqda. Mamlakatimiz pragmatik tashqi siyosat yuritmoqda, jahon hamjamiyati bilan ochiq va faol muloqot olib bormoqda. Bosh Qomusimiz davlatimiz taraqqiyotining huquqiy poydeori sifatida keng ko‘lamli islohotlarni izchil va muvaffaqiyatli amalga oshirish, fuqarolarimiz huquq va erkinliklarini muhofaza qilish, demokratik jamiyat qurish hamda mamlakatimiz ravnaqiga xizmat qilmoqda.

Konstitutsiyamizning 14-moddasi qayd etib o‘tilganidek, davlat o‘z faoliyatini inson farovonligini va jamiyatning barqaror rivojlanishini taʼminlash maqsadida qonuniylik, ijtimoiy adolat va birdamlik prinsiplari asosida amalga oshiradi. Bu borada so‘nggi yillarda mamlakatimizda yuz berayotgan yangilanish va o‘zgarish jarayonlari davlatchilik rivojining yangi bosqichga ko‘tarilishida hal qiluvchi omilga aylanmoqda. Bu jarayonlar avvalo boshqaruv tizimini modernizatsiya qilish, jamiyatda ochiqlik va shaffoflikni taʼminlash, davlat idoralari faoliyatini samarali tashkil etish kabi vazifalarni o‘z ichiga olib, davlat va jamiyat munosabatlarini yanada yuqori bosqichlarga olib chiqmoqda.

Bu o‘zgarishlarning zamirida xalqimizning faol fuqarolik pozitsiyasi, jamiyatda hamjihatlik va birdamlik muhitining mustahkamlanishi muhim o‘rin tutmoqda. Shu bilan birga, davlat rahbarining qatʼiy irodasi, islohotlar strategiyasidagi izchillik va amaliy natijalarga yo‘naltirilgan yondashuv mamlakatdagi siyosiy va ijtimoiy barqarorlikni taʼminlab bermoqda.

Yangi davrning yana bir muhim jihati – aholi tafakkurida kuzatilayotgan o‘zgarishlardir. Xususan, fuqarolarda tashabbuskorlik, masʼuliyat va fidoyilik kabi fazilatlar shakllanib borayapti. Bu esa, o‘z navbatida, jamiyatda maʼnaviy yuksalish jarayonini kuchaytirib, taraqqiyotning barqaror asoslarini yaratishga xizmat qilmoqda.

Huquq va erkinliklar taʼminlangan, odamlari erkin yashab, mehnat qilib, daromad topadigan mamlakatda davlat ham, jamiyat ham rivojlanadi. Zero, Yangi O‘zbekistonda amalga oshirilayotgan islohotlarning zamirida eng avvalo “Inson qadri uchun” degan ezgu g‘oya turibdi. Keyingi sakkiz yilda mamlakatimiz iqtisodiyotiga 130 milliard dollarlik investitsiya kirib keldi, ko‘plab yangi quvvatlar ishga tushirildi, ming-minglab doimiy ish o‘rinlari yaratildi, tadbirkorlikka keng yo‘l ochilib, aholiga qulay mehnat sharoiti yaratib berilganligi tufayli jon boshiga daromad 3,5 ming dollarga yetdi. Yurtimizda har bir fuqaroning huquq va erkinliklarini taʼminlash, ular uchun zarur mehnat sharoitlarini yaratib berish hamda ijtimoiy himoya qilish bo‘yicha mustahkam qonuniy asoslar yaratildi.

Asosiy Qomusimizning 68-moddasiga ko‘ra yer, yerosti boyliklari, suv, o‘simlik va hayvonot dunyosi va boshqa tabiiy resurslar umummilliy boylikdir. Ulardan oqilona foydalanish zarur va ular davlat muhofasidadir, deb mustahkamlangan. Mazkur moddaning ahamiyati shundaki, birinchidan, tabiiy boyliklarimiz xalqimizning boyligi va mulki ekanligi, ikkinchidan, tabiiy resurslardan faqat oqilona foydalanish zarurligi, uchinchidan, respublikamiz tabiati davlat muhofazasiga olinganligi kabi muhim tamoyillarni mustahkamlaydi.

Navoiy kon-metallurgiya kombinati yerosti boyliklarini o‘zlashtirishda o‘z oldiga ijtimoiy masʼuliyatni olgan holda tabiiy resurslardan oqilona foydalanish bo‘yicha aniq chora-tadbirlarni amalga oshirib kelmoqda. Ayniqsa, yashil energetikadan keng foydalanish va suv resurslarini tejash bo‘yicha salmoqli natijalarga erishilmoqda.

Xulosa qilib aytganda, Konstitutsiya O‘zbekistonda demokratik islohotlar, inson huquqlari himoyasi va jamiyat barqaror rivojlanishining asosiy huquqiy poydevoridir. So‘nggi yillarda mamlakatda boshqaruv tizimi yangilanib, iqtisodiyotga katta investitsiyalar kirib, fuqarolar farovonligi oshmoqda. Tabiiy resurslar xalq boyligi sifatida muhofaza qilinib, ulardan oqilona foydalanish siyosati izchil amalga oshirilmoqda.

Fursatdan foydalanib kombinatimiz jamoasini 8-dekabr – O‘zbekiston Respublikasi Konstitutsiyasi kuni bilan chin qalbimdan samimiy muborakbod etaman.

Quvondiq SANAQULOV,

“NKMK” AJ Boshqaruvi raisi - bosh direktori,

Oliy Majlis Senati aʼzosi.