Yaqinda Toshkent shahridagi “Yangi O‘zbekiston” universitetida O‘zbekiston Respublikasi Korrupsiyaga qarshi kurashish agentligi tomonidan “IT Park Uzbekistan”, “Navoiy kon-metallurgiya kombinati” AJ bilan hamkorlikda “Korrupsiyaga qarshi kurashish bo‘yicha xakaton” (“Anti-Corruption Hackathon”) tanlovi o‘tkazildi.

Mazkur tadbirni o‘tkazishdan maqsad – korrupsiyaga toqatsiz yangi avlodni tarbiyalash, talaba va yoshlarning korrupsiyaga qarshi loyihalari, startap va innovatsion tashabbuslarini qo‘llab-quvvatlash bo‘yicha davlatimiz rahbari tomonidan belgilab berilgan vazifalar ijrosini taʼminlash.

Uch kun davom etgan tanlovda qariyb 150 nafar yosh dasturchi va mutaxassis ochiq maʼlumotlardan foydalangan holda korrupsiyaga qarshi samarali va innovatsion yechimlar – dasturiy taʼminotlar, onlayn platformalar ishlab chiqish bo‘yicha yakka va jamoaviy holda o‘zaro bellashdi.

Xakaton yakuniga ko‘ra quyidagi jamoalar g‘olib deb topildi:

1-o‘rin – “Uzinfocom” jamaosi (Davlat xaridlarida manfaatlar to‘qnashuvini oldini olish);

2-o‘rin – “Equilibrium” jamoasi (Sunʼiy intellekt yordamida manfaatlar to‘qnashuvini aniqlash);

3-o‘rin – “Austrum team” jamoasi (“Haj” va “Umra” ziyorat tadbirlarini tashkil etish jarayonlarini raqamlashtirish).

Tanlov g‘oliblari tashkilotchilar tomonidan esdalik sovg‘alari bilan taqdirlandi.

G‘olib jamoa joriy yilning sentyabr oyida Gonkong shahrida bo‘lib o‘tadigan Osiyo yoshlar korrupsiyaga qarshi kurashish xakatoni (“Coding4Integrity”)da O‘zbekiston nomidan ishtirok etish imkoniyatini qo‘lga kiritdi.

“NKMK” AJ kelgusida Korrupsiyaga qarshi kurashish agentligi bilan birgalikda mazkur yo‘nalishdagi hamkorlikni davom ettiradi.

Manba: Korrupsiyaga qarshi kurashish agentligi

https://anticorruption.uz/uz/article/korrupsiyaga-qarshi-kurashish-boyicha-xakaton-goliblari-taqdirlandi